Эрүүл мэндийн яамнаас халдварын нөхцөл байдлын талаар мэдээлэл хийлээ. Энэ үеэр ДЭМБ-ын сүүлийн үеийн мэдээллийг өглөө.
ДЭМБ-ын ажилтан О.Ариунтуяа: "Коронавирусийн халдварын 292142 тохиолдол дэлхийн хэмжээнд бүртгэгдэж, нас баралт 12784 тохиолдол бүртгэгдсэн байна. Африкийн бүсийн дөрвөн улсад шинээр халдвар бүртгэгдсэн. Дэгдэлт эрчимтэй байгаа Европын бүсэд нэг хоногийн дотор 20 мянга орчим тохиолдол шинээр нэмэгдэж, 1000 хол давсан нас баралт бүртгэгджээ.
Ихэнх улс орнууд иргэддээ гэртээ өөрийгөө тусгаарлахыг зөвлөж байна.
Сургууль цэцэрлэгийг хаах, зорчигч тээврийг хязгаарлах, зогсоох зэрэг арга хэмжээ авахын зэрэгцээ шаардлагагүй тохиолдолд гэрээсээ гарахгүй байхыг уриалж байна.
ДЭМБ-аас гэртээ тусгаарлагдах үедээ дасгал хөдөлгөөн хийж, идэвхтэй байх заавар гарган ажиллаж байна.
ДЭМБ-аас батлагдсан хөнгөн, хүнд гээд бүх тохиолдол болон тэдгээрийн бүх хавьтлыг тусгаарлахыг зөвлөж байгаа. Тархалтын дараагийн дараагийн үе шатанд бэлдэхдээ аймаг, дүүргүүд харьяаллын хүн амдаа зориулж хэдэн тусгаарлах байр хаана гаргахыг урьдчилан тодорхойлох ажлыг хийж байна.
ДЭМБ-ын нэрийг ашигласан цахим гэмт хэрэг ихсэх хандлагатай байгаа тул иргэд, байгууллагууд "ДЭМБ-аас" гэсэн и-мэйл ирсэн тохиолдолд нягтлан шалгаж, хувийн мэдээлэл, мөнгөө алдахгүй байхыг анхааруулж байна.
Мөн халдварын хяналт сэргийлэлт, лабораторийн удирдамжийг шинэчлэн баталсан" гэлээ.
