Орхон аймагт өнгөрсөн онд нийт халдварт өвчний 36 хувийг бэлгийн замаар дамжих халдварт өвчин эзэлжээ. Халдварт өвчин дортоо тэмбүүгийн өвчлөл 60 орчим хувийг эзэлсэн байна.
Мөн өнгөрсөн онд жирэмсэн 53 эх тэмбүүгээр өвчилсөн байжээ.
Жирэмсэн эмэгтэй тэмбүүтэй байна гэдэг нь эрсдэлт бүлгээс хальж нийт иргэдийн дунд тэмбүүгийн өвчлөл тархсаны нэг үзүүлэлт гэдгийг мэргэжилтэн хэлсэн байна.
Иймд “Тэмбүүг устгая” аяны хүрээд Орхон аймгийн эрүүл мэндийн газар нийт хүн амын дунд эрсдэлт бүлгийн иргэдийн судалгааг гаргасан бөгөөд нийт 57 мянга хүн эрсдэлт бүлэгт байна гэж тогтоожээ.
Энэ онд эрсдэлт бүлгийн хүн амын 70-80 хувьд нь Тэмбүүгийн эрт илрүүлгийн үзлэгийг зохион байгуулахаар болжээ.
Аймгийн Эрүүл мэндийн газар ХӨСҮТ-тэй хамтран өрхийн эрүүл мэндийн төвүүдэд хавьтал судлаачдыг ажиллуулж эхэлсэн байна. Орон нутгаас эрт илрүүлгийн үзлэг шинжилгээнд өнгөрсөн онд 12 сая төгрөгийн дэмжлэг үзүүлсэн бол, энэ онд мөн тооны дэмжлэгийг үзүүлнэ.
Мөн бэлгийн замаар дамжих халдварын кабинетэд шаардлагатай тоног төхөөрөмжийг шийдвэрлэжээ. Ингэснээр бэлгийн замаар дамжих халдварт өвчний илрүүлэг сайжирч, эрүүл хүнийг бий болгох нөхцөл бүрдэнэ гэжээ.
montsame.mn
