Япон улсад үйлдвэрлэгдсэн оношлуураар шинэ коронавирусийн халдварыг илрүүлэх оношилгоог Монгол улсад хийж байгаа ба өнөөдрийг хүртэл сэжиглэгдсэн 300 гаруй тохиолдолд тус оношлуурыг ашиглаж, коронавирусийн халдвартай хүн илрээгүй сайхан мэдээтэй байна.
Дэлхий даяар маш хурдацтай тархаж, 40 гаруй оронд халдвар тээгч илрээд байгаа энэ үед тус өвчний халдварын голомт БНХАУ-тай 4700 км хуурай газраар хиллэдэг Монгол улсад халдвар илрээгүй гэдэгт зарим иргэд эргэлзэж байгаагаа илэрхийлсээр байгаа.
Иймд иргэдийн эргэлзээг тайлах үүднээс эрүүл мэндийн салбарынхан коронавирусийн оношлуурын үр дүнг туршилтаар шалгажээ.
Тодруулбал, амьсгалын замын цочмог халдварын 60 тохиолдолд шинэ коронавирусийн оношилгоог тус багажаар давхар хийсэн байна. Ингэхдээ түүврийн аргаар бүх шатлалын эмнэлгүүдэд эмчлүүлж буй хүнд, хөнгөн өвчтнүүдэд оношлогоог хийхэд шинэ коронавирусийн халдвар илрээгүй байна. "Оношлогоо үнэн зөв хийгдэж байна, оношлуурын чанарт эргэлзэх хэрэггүй" гэж Эрүүл мэндийн сайд Д.Сарангэрэл мэдэгджээ.