Эрүүл мэндийн яамнаас коронавирусийн цаг үеийн нөхцөл байдлын талаар мэдээлэл хийлээ.
Энэ үеэр БНСУ-д Монгол улсын иргэн коронавирусын халдвар авсан гэх мэдээллийн талаар дэлгэрэнгүй мэдээллэв. Коронавирус илэрсэн Монгол улсын иргэн нь элэгний архаг хууч өвчтэй бөгөөд энэ сарын 12-ны өдөр Монгол улсаас БНСУ руу эмчилгээ хийлгэхээр эхнэр, эгчийн хамтаар зорчсон байна. Түүнээс тус вирусийн халдвар илэрсэн бол эхнэр, эгч хоёроос нь илрээгүй байна. Өвчтөн очсон даруйдаа тухайн бүсийн дүүргийн эмнэлгээр үйлчлүүлж байсан байна.
Энэ талаар ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл: "35 настай Монголын харъяат иргэн. БНСУ руу эмчлүүлхээр явсан. Өчигдөр шинжилгээ өгсөн. Нэмэх буюу коронавирус илэрсэн. Мэргэжлийн халдвар судлагчийн хувьд судлахад өвчлөлийн нууц үеийг тооцож үзэхэд энэ хүн БНСУ-д Нанжун хотын дүүргийн эмнэлгээр явж, шинжилгээ эмчилгээ хийлгэж байхдаа халдвар авсан байх өндөр магадлалтай гэж үзэж байна. ГХЯ, цагдаа, хууль хяналтын байгууллага хамтран ажиллаж өвчтөнийг хаагуур явсан, үйлчлүүлсэн, ямар шинжилгээ өгсөн бүх асуудлыг тандан судалж байна" гэв.
Мөн түүний эхнэр, эгчид коронавирус илрээгүй тул халдварын тус улсад эмчилгээ, шинжилгээ хийлгэж байх хугацаандаа авсан гэж дүгнэжээ.