Эрүүл мэндийн сайд Д.Сарангэрэл өнөөдөр Улсын Нэгдүгээр төв эмнэлгийн засвар шинэчлэлийн ажилтай танилцав.
Тус эмнэлгийн Гастроэнтерологийн дурангийн хэсэгт 2019 оны сүүлээр иж бүрэн завсар шинэчлэлийн ажил хийж олон улсын стандартад нийцсэн, үйлчлүүлэгч болон эмч, ажилчдад тав тухтай орчныг бүрдүүлэн шинэ зохион байгуулалтаар үйл ажиллагаагаа эхлүүлж байна.
Энэхүү засварын ажил хийснээр дурангийн бохир цэвэр урсгалтай, хянах өрөөтэй, ариутгалын хэсгийн урсгал зааврын дагуу явах боломжтой юм. Мөн үйлчлүүлэгчийн хувцас солих, рентген өрөөтэй болсноор өнөө үед элэг шилжүүлэн суулгасны дараах оношилгоо эмчилгээг цаг алдалгүй хийх боломж бүрдэж байна.
УНТЭ-ийн Гастроэнтерологийн дурангийн хэсэг анх 1973 онд байгуулагдан үйл ажиллагаагаа оптик дурантай эхэлж байв. 2006 онд Монгол Улсад “FUJINON” видео-эндоскопийн дурантай болж үйл ажиллагаагаа өргөжүүлсэн бөгөөд 2013, 2016 онд Австрийн Засгийн газрын төсөл, Япон улсын тусламжийн хүрээнд хамгийн сүүлийн үеийн “Olympus-EXERA III” загварын /ходоод, бүдүүн гэдэс, уушиг, дээд гэдэс/ дурантай болсноор олон улсын жишигт ойртон дотрын эмч нар өөрсдөө дурангийн оношилгоог хийдэг болжээ.
Тус кабинет 2011 онд жилдээ 5000 орчим оношилгоо хийж байсан бол 2014 оноос дурангийн сүүлийн үеийн 14 мянга орчим эмчилгээг практикт эрчимтэй нэвтрүүлж эхэлсэн байна.
Жил бүр дурангийн хэсгийн үйл ажиллагаа өргөжиж, үзлэг оношилгооны тоо өсч байгаа боловч ажиллах орчин хязгаарлагдмал стандартын шаардлагад бүрэн нийцдэггүй байжээ.
