Кино ертөнцийн хамгийн нэр хүндтэй шагнал гардуулах ёслол болох Оскарын 92 дахь наадам эхэллээ. 

Энэ өдөр жүжигчин Брэд Питт "Once Upon a Time in Hollywood" кинонд бүтээсэн Клифф Бутын дүрээрээ "Шилдэг туслах дүр" Оскарын шагнал хүртлээ.

Жүжигчин Брэд Питтийн хувьд энэхүү шагнал нь жүжигчний ангиллаар хүртсэн анхны Оскар болж байгаа бөгөөд өмнө нь, 2014 онд, түүний продюсерлосон "12 Years a Slave" кино тухайн жилийн Оскарын шилдэг киногоор тодорч байсан билээ.

Брэд Питт шагналаа гардан авахаар наадмын тайзнаа гарахдаа талархлын үгсээ ийнхүү эхлүүлсэн юм. "Зохион байгуулагчдын хэлснээр надад үг хэлэх 45 секунд л бий. Энэ нь энэ долоо хоногт АНУ-ын сенатын зүгээс Жон Болтонд өгсөн хугацаанаас яг 45 секундээр илүү юм байна.

Миний хийсэн бүхэнд хүүхдүүд маань өнгө нэмдэг, би та нартаа хайртай. Тарантино, кино урлагийн салбар чамгүйгээр уйтгартай байх байсан" гэлээ.

Брэд Питт өмнө нь Америкийн кино академийн шагнал гардуулах ёслолын хүрээнд "12 Monkeys" киногоор шилдэг туслах дүрийн жүжигчин, "The Curious Case of Benjamin Button" болон "Moneyball" кинонуудаар шилдэг эрэгтэй жүжигчний төрөлд нэр дэвшиж байсан билээ.