АНУ-ын Пенсильвания мужийн Аллентаун хотын “PPL Center” спортын ордонд бямба гаригийн үдэш мэргэжлийн боксын WBC холбооны 57,2 кг-ын жингийн дэлхийн аварга “Мистер” хочит Гэри Рассель цол хамгаалах тулаанаа IBO холбооны дэлхийн аварга “King Tug” Нямбаярын Төгсцогттой хийж яллаа.

Энэ удаа Гэри Рассель "Би Чингисийн дайралтыг зогсооно" гэсэн амлалтаа ийнхүү биелүүлж чадсан бол Н.Төгсцогт мэргэжлийн боксын ринг дээр анхны ялагдлаа авлаа.

Монгол хүү “King Tug” Н.Төгсцогт 12 үеийн турш урагш довтолж тулалдсан хэдий ч оновчтой цохилт хийж чадахгүй байсаар ялагдал хүлээв. Харин Гэри Рассель хурдтай, хараатай тамирчин гэдгээ харуулж хэд хэдэн оновчтой цохилт хийж давуу байдлаа хадгалсаар Дэлхийн аваргын бүсээ хамгаалж чадлаа.

Н.Төгсцогтын хувьд WBC-гийн аваргатай хийсэн энэ удаагийн тулаан маш том туршлага болов. Түүний нас залуу, боломж нээлттэй байгаа учраас монголчуудаа баярлуулах ялалтын өдөр удахгүй ирнэ хэмээн фэнүүд нь хүлээж байна.