ДЭМБ-ын мэдээгээр 08.00 цагийн байдлаар, шинэ коронавируст халдварын тохиолдол 34.722 бүртгэгдсэн бөгөөд тус вирусний өвчлөлөөр амиа алдсан хүний тоо 722 хүрсэн талаар өнөөдөр ЭМЯ-ны ээлжит хэвлэлийн хурлын үеэр ДЭМБ-ын мэргэжилтэн Б.Ариунтуяа мэдээллээ.
БНХАУ-аас гадна дэлхийн 24 улсад уг вирусний халдвар гарсан, нэмж бүртгэгдээгүй байгааг тэрбээр мэдээлэлдээ тодотгосон. Түүнчлэн Японы далайн боомтод зорчсон 3700 зорчигчтой хөлөг онгоцонд халдвар авсан 61 хүн илэрсэн байна. Үүнээс харахад халдварын тархалтын зэрэг 1.6 хувьтай байгаа аж.
БНХАУ-д өвчилсөн хүний 17 мянга буюу 92 хувь нь хөнгөн байгаагаас 15 хувь нь хүндэрч гурван хувь нь хүнд зэрэгтэй байна. Ихэвчлэн настай, архаг хууч өвчтэй хүмүүст уг халдвар илэрчээ. ДЭМБ-аас өвчин бага тархаж байгаа улс орнуудад хувийн хамгаалах хэрэгсэл нөөцлөхгүй байхыг сануулжээ.
Монгол улсад коронавируст халдвар авсан байж болзошгүй есөн иргэнийг тусгаарлан шинжилгээ авч, шинжилгээний хариу сөрөг гарсан буюу коронавируст халдвар илрээгүйг ХӨСҮТ-ийн захирал Б.Нямхүү мэдээллээ.
