ЭМЯ-наас шинэ төрлийн коронавируст халдварын нөхцөл байдлын талаар өдөр бүр мэдээлэл өгч байгаа билээ. Өнөөдрийн мэдээллийг хүргэж байна.
БНХАУ-ын Эрүүл мэндийн хорооны мэдээллээр өнөөдөр өдрийн 10.00 цагийн байдлаар дэлхий дахинаа шинэ төрлийн коронавируст халдвараар нас барсан хүний тоо 106 хүрч, халдвараар өвчилсөн хүний тоо 4474 болсон байна. Халдвар авсан байж болзошгүй хүний тоо 5796 тохиолдол байгаа бол 63 хүн эдгэрчээ.
Мөн манай улс тус халдвараас урьдчилан сэргийлэх, эрүүл мэндийн байгууллагын бэлэн байдлыг хангах чиглэлд Засгийн газрын нөөц сангаас 4.2 тэрбум төгрөгийн санхүүжилтийг төсөвлөсөн байна.
Тус мөнгийг эм, эмнэлгийн хэрэгсэл, хувийн хамгаалах хэрэгсэл, оношлуур, халдваргүйжүүлэлт, ариутгал хийх бүтээдэхүүнийг худалдан авах, эмч, эмнэлгийн ажилтнуудын илүү цагийн хөлс, түлш шатахуунд зарцуулна.
Мөн зорчигчийн биеийн халууныг хэмжих суурин термокамер, дижитал гар термометр, богино долгионы станц, N95 маск, мананцар үүсгэн халдваргүйжүүлэгч зэрэг нэн шаардлагатай тоног төхөөрөмжийг худалдан авахад зарцуулахаар болжээ.
ЭМЯ-наас гараа тогтмол савандаж угаах, амны хаалт хэрэглэх, өвчлөл бүртгэгдсэн улс оронд зорчихгүй байхыг анхааруулж байна.