Өнөөдөр Эрүүл мэндийн сайд Д.Сарангэрэл Халдварт Өвчин судлалын үндэсний төвд ажиллаж байна. Манай улсад одоогоор шинээр гарсан Коронавирусийн оношлуур байхгүй бөгөөд ирэх долоо хоногт хүлээн авна гэдгийг энэ үеээр хэлсэн юм.

Дэлхий дахинд өчигдөрийн байдлаар шинэ төрлийн коронавирусийн халдварын тохиолдол 844, нас барсан тохиолдол 17 байсан бол яг одоо халдварын тохиолдол 1,287, нас барсан тохиолдол 41 болж нэмэгдлээ. 

Эрүүл мэндийн сайд Д.Сарангэрэл: " Бид дэлхийн мэндийн байгууллагуудтай нягт хамтарч ажиллаж байна. Энэ халдвараа өвчлөгсдийн тоо нэмэгдсээр байна. Бид халдварын тохиолдол илэрвэл шууд зарлаж, яаралтай арга хэмжээ авна.

Одоогоор халдвартай тохиолдол бүртгэгдээгүй ч бид халдвар хаалга тогшиж байгаа гэж үзэж байна. Учир нь ийм үед бид хамгийн муу байдлаар дүгнэж, урьдчилан сэргийлэх арга хэмжээгээ сайн авах ёстой. 

Манай лаборатори томуугийн 21 вирусийг оношлох боломжтой. Шинээр үүссэн коронавирусийг оношлоход лабораторийн чадамжгүй байгааг нуухгүй. 21 вирусийн аль нэг нь илрэхгүй бол коронавирусийн сэжигтэй тохиолдол байна гэж үзнэ. Энэ бол бидний хамгийн сэтгэл зовоож байгаа асуудал. Цоо шинэ вирус учраас дэлхий бэлэн биш байна. Оношлуур болон урвалж бодис үйлдвэрлэхээр ажиллаж байна. Япон улсаас ойрын хугацаанд оношлуур урвалжийг нийлүүлэхээ мэдэгдсэн. Гэхдээ ирэх долоо хоногт манай улс оношлууртай болох юм" гэлээ.

Энэ үеээр ДЭМБ-ын Монгол дахь суурин төлөөлөгчийн үүрэг гүйцэтгэгч Др.Сергей Диордица: "ДЭМБ-аас Монгол Улсад боломжоороо тусална гэж амласан. Сэжигтэй тохиолдол гарвал сорьцоо шуурхай лавлагаа лабораторидоо өгч оношоо баталгаажуулах шаардлагатай. Одоогоор бид оношийг үгүйсгэх байдлаар шинжилгээгээ баталгаажуулаад явж байгаа" гэв.