Эрүүл мэндийн сайд Д.Сарангэрэл шинээр тархаад буй коронавирусын талаар мэдээлэл хийв.
Сайд Д.Сарангэрэл "ДЭМБ-аас өгсөн мэдээллээр вирусийн үүсэл тодорхойгүй байна. Урьдчилсан байдлаар могой, минж, дорго, сарьсан багваахайнаас үүдэлтэй байж магадгүй гэж таамагласан.
Шинэ төрлийн коронавирусийн халдвар авсан үед томуу, томуу төст өвчинтэй адил шинж тэмдэг илэрч байгаа. Манай лаборатори 21 төрлийн вирусийг илрүүлдэг. Халдвар авсан байж болзошгүй гэж үзэж байгаа хүмүүсээс шинжилгээ аваад 21 төрлийн вирусээс аль нэг нь илэрвэл шинэ төрлийн коронавирусийн халдвартай биш гэж үзэж байна.
Хил гаалиар орж ирж байгаа хүмүүс халуурч байвал шууд тусгаарлаж байгаа. Ингээд шинжилгээний хариугаар үгүйсгэгдвэл эмнэлгээс гаргана. Халдварын тохиолдол гарвал тусгаарлахаар ХӨСҮТ-д 50 ортой тасаг бэлдсэн.
Өнөөдрөөс эхлэн өдөр бүр ДЭМБ, ЭМЯ, ХӨСҮТ хамтраад маш хурдацтай өөрчлөгдөж байгаа өвчлөлийн явцын талаар мэдээлэл өгөх шийдэлд хүрээд байна" гэв.
Сэрэмжлүүлэг:
- Шинэ Коронавирусийн халдварын талаар эрүүл мэндийн байгууллага (www.mohs.mn; https://www.facebook.com/www.mohs.mn/; https://www.facebook.com/eocmohs/)-аас өгч байгаа сэрэмжлүүлэг, зөвлөмжийг мөрдөх, олон нийтийн сүлжээгээр гарч байгаа буруу ташаа мэдээлэлд автахгүй байх
- Өвчлөл бүртгэгдсэн улс, орнуудад аль болох зорчихгүй байх
- 14 хоногийн дотор өвчлөл бүртгэгдсэн дээрх улс орнуудад зорчсон хүн өндөр халуурах, ханиалгах, амьсгалахад хүндрэлтэй болох зэрэг шинж тэмдэг илэрвэл амны хаалт зүүж, эрүүл мэндийн байгууллагад яаралтай хандах
- Амны хаалт тогтмол зүүж хэвших
- Гараа тогтмол савандаж угаах
- Ханиаж, найтаахдаа ам, хамраа алчуураар дарах, эсвэл шууны дотор тал руу ханиах
- Бага насны хүүхдийг олон нийтийн газраар дагуулж явахгүй байх
- Биеийн дархлаа сайжруулах амин дэм хэрэглэх зэргийг зөвлөж байна.
