БНХАУ-д бүртгэгдээд буй шинэ төрлийн коронавирусээр үүсгэгдсэн вирусээр халдварласан байж болзошгүй иргэд Хонг Конгийн нислэгээр ирсэн гэх мэдээллийн дагуу МХЕГ-ын холбогдох албан тушаалтан мэдээлэл өгчээ.
МХЕГ-ын Улсын ахлах байцаагч Т.Төмөрбаатар:
-"Энэ сарын 9-нд Хонг Конгоос ирсэн 6 настай хүүхэд, 10-нд ирсэн 20 настай иргэн онгоцонд халуурч ирсэн тул буумагц нь хилийн мэргэжлийн хяналт, ХӨСҮТ-ийнхэн хамтран ажиллаж тусгаарлаад, коронавирусээр биш өөр төрлийн эргэлтэд байгаа вирусээр халдварлаж, хоолой нь үрэвссэн болохыг тогтоосон.
БНХАУ-д бүртгэгдээд буй шалтгаан нь тодорхойгүй уушгины хатгалгаа өвчний үүсгэгчийг шинэ төрлийн Коронавирусээр үүсгэгдсэн болохыг 2020 оны нэгдүгээр сарын 9-ний өдөр Дэлхийн эрүүл мэндийн байгууллагаас зарласан. БНХАУ-ын зүгээс ч тус вирусийн тархалтыг хяналтандаа авсан талаар мэдэгдээд байгаа.
Гэсэн хэдий ч мэргэжлийн хяналтын байгууллага, эмнэлгийн байгууллагуудтай хамтраад БНХАУ-тай хиллэдэг бүх боомт болон нислэгт хяналт тавьж, иргэдээс эрүүл мэндийн асуумж авч, халуунтай иргэдийг шууд эмнэлэгт шилжүүлж байгаа. Одоогоор шинэ төрлийн коронавирусээр үүсгэгдсэн өвчний тохиолдол манай улсад гараагүй байна" гэв.
Хөрш улсад бүртгэгдсэн уг өвчинтэй холбогдуулан ЭМЯ, ХӨСҮТ, ЗӨСҮТ, МХЕГ-ын хамтарсан эрсдлийн үнэлгээний баг одоогийн байдлаар “Дунд” зэргийн эрсдэлтэй гэж дүгнэлт гаргаад байгаа бөгөөд иргэдийг аль болох шинэ төрлийн вирусийн халдвар гарсан бүс нутаг руу зорчихгүй байхыг зөвлөсөөр байна.
