Эмч, сувилагч нар өнөөдөр хөдөлмөрлөх эрхээ шаардаж жагслаа. Жагсаалд 294 эрүүл мэндийн байгууллагын 48 мянга гаруй эмч, эмнэлгийн ажилтнуудын төлөөлөл болсон эмч, эмнэлгийн ажилтнууд оролцов. Нийслэлийн  болон орон нутгийн бүх шатны эмнэлгүүдийн нийт 8,300 төлөөлөл оролцлоо.  

Өнөөдрийн байдлаар Монгол Улсын хэмжээнд нийт 50 гаруй мянган эмч, эмнэлгийн ажилтнууд ажиллаж байна. Үүнээс өнөөдрийн жагсаалд 19 мянга нь санал нэгджээ. Жагсаал зөвхөн нийслэлд биш, 21 аймагт нэгэн зэрэг болж өндөрлөв.

Өмнөх жагсаал цуглаанаар зохих шаардлагуудыг УИХ, Засгийн газарт хүргүүлж,  эмнэлгийн ажилтнуудын цалин, хөдөлмөрийн үнэлэмж, хүний нөөцийг нэмэгдүүлэх гэсэн шаардлагуудыг тавьж байсан хэдий ч аль нь ч биелээгүй гэж үзэж дахин шаардлага хүргүүлэхээр өнөөдрийн жагсаалыг зохион байгуулжээ. Өнөөдрийн жагсаалын гол цөм нь сувилагчид байв. Ажилгүйдээ жагсч байгаа юм биш, авч байгаа цалин нь амьдралд хүрэлцэхгүй байна хэмээн тайлбарлажээ. Улмаар Засгийн газар, Ерөнхий сайд, Эрүүл мэндийн сайдад хандан дөрвөн шаардлага тавив.

Тэд “Сувилагч робот биш”, “Цаг наргүй зүтгэсэн сувилагчдад эрүүл эрхтэн алга”, “Сувилагч бид стандарт бус хөдөлмөр эрхэлж байна”, “Сувилагч өглөө цагтаа буудаггүй, өвдөж, ядарч, шантарч, халширч байна”, “”Сувилагч бид цаг завгүй зүтгэж, туйлдаж байна” гэсэн уриа лоозон барьж жагсаалд оролцлоо. 

Монголын Эрүүл мэндийн ажилтны үйлдвэрчний эвлэлийн холбооноос Засгийн газар, Ерөнхий сайд, Эрүүл мэндийн сайдад хандан шаардлага хүргүүлж байгаа юм.

Шаардлагад:

 -Эрүүл мэндийн салбарын ажилтны цалинг энэ оны хоёрдугаар улиралд багтаан 50-иас доошгүй хувиар нэмэгдүүлэх

-Сувилагчдыг төрөөс дэмжиж, нийгмийн хамгаалал, орон тоог 9,000-р нэмэгдүүлэх, хүний нөөцийг тогтоох, хүний нөөцийн стандартын дагуу ажиллахад шаардагдах хөрөнгийг 2019 оны төсөвт тусгах

-Эрүүл мэндийн салбарын ажилтны үр дүнгийн мөнгөн урамшууллыг 60 хувьд хүргэх

-Өрхийн эрүүл мэндийн төвүүдийн эмч, ажилтнуудын томуугийн дэгдэлтийн үед ажилласан илүү цагийн хөлс олгохыг шаардаж гурав хоног буюу 72 цагийн хугацаа өгөв.

Хэрвээ шаардлагуудыг тогтсон хугацаанд багтаан шийдвэрлэхгүй бол хуулийн дагуу ажил хаяхаа мэдэгдэв. 

Засгийн газар, Ерөнхий сайд, Эрүүл мэндийн сайдад 72 цагийн хугацаатай албан шаардлага хүргүүлж тодорхой шийдэлд хүрэхгүй бол ажил хаяхаа мэдэгдлээ.