Их эзэн Чингис хааны мэндэлсэн өдөр буюу өвлийн тэргүүн сарын шинийн 1-нд улс орныхоо тусгаар тогтнол бүрэн эрхт байдал, үндэсний эв нэгдлийг бататган бэхжүүлэх, төрт ёс, түүх соёлынхоо уламжлалыг гүнзгий судалж, хойч үедээ өвлүүлэх, тэдгээрийг дэлхий дахинд сурталчлан таниулах үйлсэд үнэтэй хувь нэмэр оруулж, төр, нийгэм, үндэстний өмнө онцгой гавьяа байгуулсан иргэнд Монгол Улсын Төрийн тэргүүн зэргийн "Чингис хаан" одонг гардуулдаг уламжлалтай билээ.
Энэ удаагийн "Чингис хаан" одонг The Hu хамтлагт гардуулсан бөгөөд хамтлагийн үүсгэн байгуулагч, продюсер Б.Дашдондог гардан авлаа.
Тэрээр дээд хөх тэнгэр, төрийн гурван өндөрлөг, ард түмэн, гэр бүл, найз нөхөддөө хүндэтгэл үзүүлэн мэхийн ёсолсон юм.
Продюсер Б.Дашдондог: "Та бүхэндээ эзэн Чингис хааны мэлмий гийсэн Монголчууд бидний бахархалт, бэлэгт сайн өдрийн мэнд хүргэе. Эзэн Чингис хааны нэрээр адислагдаж, дэлхийн цор ганц эрхэм дээд шагналыг хүртэж "The Hu" хамтлагийн нэрийн өмнөөс хүлээн авч байгаадаа туйлын баяртай байна. Энэ цаг үед "The Hu" хамтлагийн даруу төлөв залуус маань Монгол угсаатны цаглашгүй их түүх, өв соёл, үндэсний урлаг, тэгш сайхан орноо суртачлан, нэр алдраа цуйраатуулан дэлхийн үзэгчдийг дуу хуураараа байлдан дагуулсаар байна. Энэ хүртэл хамт байж хүч хөдөлмөр, хүнлэг сэтгэл, тус дэмээрээ гайхалтай амжилтыг хамтдаа бүтээсэн хүн бүрт талархалаа илэрхийлж байна. Гавьяа нь та бүхнийх минь юм шүү.
Өвөг дээдсийнхээ үйл хэрэг, хүсэл мөрөөдлийг бага ч болтугай урагшлуулахын төлөө бид амьдрах ёстой. Мөнх хөх тэнгэр биднийг ивээг" гэлээ.
“The Hu” хамтлаг уран бүтээлээ анх 2018 оны сүүлээр нийтийн хүртээл болгосон бөгөөд тухайн цагаас асар богино хугацаанд маш өргөн хүрээнд түгж, дэлхийн хөгжмийн ертөнцөд монгол агуулгатай нэгэн шинэ өнгө төрх, уур амьсгалыг бий болгож дэлхий даяар олон сая шүтэн бишрэгчтэй болоод байгаа юм.
Тус хамтлаг “Гэрэг” хэмээх анхны цомгоо энэ оны есдүгээр сард гаргасан нь борлуулалтаараа дуу хөгжмийн "Billboard"-ийн жагсаалтыг тэргүүлж байгаа билээ.
“The Hu” хамтлаг хүннү рок урсгалаар уран бүтээл туурвидаг бөгөөд 11 хүний бүрэлдэхүүнтэй.
- МУГЖ Б.Дашдондог-Үүсгэн байгуулагч, продюсер
- Ц.Надмидтулга-Менежер
- Брэндон Фрайзен-Менежер
- Ц.Галбадрах-Хамтлагийн ахлагч, аянга морин хуур, хархираа хөөмэйч
- Г.Нямжанцан-Төмөр хуур, цуур, хөөмэйч
- Энхсайхан-Гал морин хуур, хөөмэйч
- Н.Тэмүүлэн-Товшуурч
- Г.Одбаяр-Бөмбөрчин
- А.Жамбалдорж-Соло гитарчин
- Б. Батхүү-Басс гитарчин
- М.Өнөмөнх-Хэнгэрэг хөгжимчин
Б.Туяа
