Гэрэл зургийг montsame.mn

Гадаадын улс орнуудад жижиг дунд үйлдвэрлэгчид, фермерүүд нэгдэж "COOP Store" буюу хамтын нэрийн дэлгүүр байгуулан бүтээгдэхүүнээ үйлдвэрийн үнээр борлуулдаг туршлага бий. Анх 1940 онд Канадын жижиг фермер эрхлэгчид нэгдэн хамтын нэрийн дэлгүүр гэх шинэ ойлголтыг нэвтрүүлснээс хойш АНУ, Япон зэрэг өндөр хөгжилтэй орнуудад энэ аргыг түгээмэл ашиглах болжээ. Хоршоо хэлбэрээр бүтээгдэхүүнээ борлуулах нь маркетинг, борлуулалтын зардлаа хэмнэж ашиг орлогоо нэмэгдүүлэх олон боломж олгодгоороо давуу талтай юм. 

Энэ жишгээр  манай 30 гаруй үндэсний үйлдвэрлэгчийг нэгтгэсэн Монголын анхны "COOP" хамтын нэрийн дэлгүүр өчигдөр нээлтээ хийлээ. Монголын анхны хамтын нэрийн дэлгүүрт ЖДҮХС-аас санхүүжилт авсан хэд хэдэн үйлдвэрлэгч бараа бүтээгдэхүүнээ танилцуулсан байна.

Энэ онд ЖДҮХС-гаас онд нийслэлд 101 ААН, орон нутагт 360 гаруй ААН-д хөнгөлөлттэй зээл олгохоор шийдвэрлэж, 80 гаруй хувийн гүйцэтгэлтэй яваа юм байна. Мөн ЖДҮХС-гаас "COOP" хамтын нэрийн дэлгүүртэй хамтран ажиллахаар санамж бичиг байгуулжээ. Жижиг дунд бизнес эрхлэгчид дан дангаараа ажиллах нь олон эрсдэл дагуулдаг. Ялангуяа бүтээгдэхүүнээ экспортод гаргахаар зорьж байгаа үйлдвэрлэгчид хүндрэл бэрхшээлээ хамтдаа даван туулж, туршлага солилцох боломжтой тухай ЖДҮХС-гийн захирал, хатагтай Б.Батцэцэг хэлэв.  

"Тэнгэри Кооп Монголиа" хоршооны тэргүүн Х.Ихбаяр: 

-Үндэсний үйлдвэрлэгчид дундын зуучлалгүйгээр бараа бүтээгдэхүүнээ борлуулах, дэлхийн зах зээл дээр өрсөлдөх боломжийг судалж үзээд хамтын нэрийн дэлгүүр нээх нь зөв юм байна гэж үзсэн. Одоогоор арьс, ноос ноолууран бүтээгдэхүүн, гоо сайхан, хувцас загвар, хүнсний чиглэлийн 30 гаруй үйлдвэрлэгч бидэнтэй нэгдээд байна. Цаашид хамтын нэрийн дэлгүүрийг Эрдэнэт, Дархан хотууд, Дорнод аймаг болон гадаадын улсуудад Монголын нэрийн барааны дэлгүүр хэлбэрээр өргөжүүлэхээр зорьж байна. Өргөн хэрэглээний сайн чанарын бараа бүтээгдэхүүн үйлдвэрлэгчид "Тэнгэри Кооп Монголи" хоршооны гишүүнээр элсэж "COOP" хамтын нэрийн дэлгүүрээр бүтээгдэхүүнээ борлуулах бүрэн боломжтой.