Өнгөрөгч баасан гаригт "Эх орон дуудаж байна" уриан дор жагсаал зохион байгуулж, УИХ-ыг яаралтай тарах шаардлага хүргүүлсэн "Үндэсний фронт" хөдөлгөөнийнхөн өнөөдөр хоёр дахь жагсаалаа зхион байгуулахаар зарласан билээ.
УИХ-ын дарга Г.Занданшатар өчигдөр хөдөлгөөнийхний шаардлагад хариу өгөхдөө "УИХ-ыыг тараах санаачилга гаргах эрх УИХ-ын даргад байхгүй" гэсэн бөгөөд энэ "Үндэсний фронт"-ынхон хүссэн хариугаа авч чадаагүй тохиолдолд Төрийн ордон луу дайрна хэмээн мэдэгдээд байсан юм.
Тиймээс ТЕГ-ын дарга Д.Гэрэл өчигдөр орой "Монголын үндэсний фронт" нэгдэлд шаардлага хүргүүлжээ.
МОНГОЛ УЛСЫН ТАГНУУЛЫН ЕРӨНХИЙ ГАЗРЫН АЛБАН ШААРДЛАГА
2019 оны 11 сарын 14 өдөр Дугаар 08 Улаанбаатар хот
“МОНГОЛЫН ҮНДЭСНИЙ ФРОНТ” ГЭХ НЭРЭЭР ҮЙЛ АЖИЛЛАГАА ЯВУУЛЖ БАЙГАА НЭГДЭЛД
“Монголын үндэсний фронт” гэх нэрийн дор 2019 оны 11 дүгээр сарын 8-ны өдөр зохион байгуулсан жагсаал, цуглааны үеэр тус нэгдлийн тэргүүн гэх иргэн Ш.Гантулга, дэд тэргүүн гэх иргэн Б.Батсайхан, Удирдах зөвлөлийн гишүүн гэх иргэн П.Шинжээравдан, Ц.Мөнхбаяр болон дэмжигч иргэн Г.Болдбаатар нар нь Эрүүгийн хуулийн тусгай ангийн 19.2 /Төрийн эрх мэдпийг хууль бусаар авах, саатуулах/, 19.3 /Төрийн өндөр албан тушаалтны амь биед халдах/, 19.8 /Экстремист үйл ажиллагаа явуулах/-т заасан гэмт хэргийн шинжийг агуулсан яриа өгүүлэл гаргаж, бусдыг өдөөн турхирсан үйл ажиллагааг удаа дараа явууллаа.
Цаашид дээрх төрлийн гэмт хэрэг гарахаас урьдчилан сэргийлэх үүднээс Тагнуулын байгууллагын тухай хуулийн 12 дугаар зүйлийн 12.1.15-д заасныг тус тус үндэслэн ШААРДАХ нь:
- “Монголын үндэсний фронт” гэх албан ёсны бүртгэлгүй нэгдлийн удирдагчдын зүгээс Үндсэн хуульт төрийн байгууллын эсрэг үйл ажиллагаа явуулах, гишүүд дэмжигчдийг гэмт хэрэг үйлдэх нөхцөлийг бүрдүүлэх, гэмт хэргийн шинжтэй үйлдэлд олон нийтийг уриалах, өдөөн турхирах аливаа үйлдэл гаргахгүй байх;
- Иргэдийг хүчирхийлэлд уриалсан, олон нийтийг эмх замбараагүй байдалд өдөөн хатгасан үйлдэл гаргахгүй байх;
- Цаашид Монгол Улсын холбогдох хууль тогтоомж, тэдгээрт нийцүүлэн гаргасан эрх зүйн актуудыг чанд мөрдөх;
Жич: Энэ шаардлагыг эс биелүүлж, гэмт хэргийн шинжтэй үйл ажиллагаа явуулах, гэмт хэрэг үйлдэх нөхцөлийг бүрдүүлэх, үүнд олон нийтийг уриалах, өдөөн турхирсан аливаа үйлдэл гаргах тохиолдолд тагнуулын байгууллагад хуулиар олгосон эрх хэмжээний хүрээнд зохих арга хэмжээ авахыг мэдэгдэж байна.
ДАРГА Д.ГЭРЭЛ
Эх сурвалж: Тагнуулын ерөнхий газар
Сэтгэгдэл (1)