УИХ-ын хоёр гишүүн мөрийтэй тоглож байгаад хуулийн байгууллагынханд баригджээ. Өөр гэмт хэрэгт явуулсан гүйцэтгэх ажиллагааны явцад УИХ-ын гишүүдийг үйлдэл дээр нь барьжээ гэх мэдээлэл хэвлэлээр гарснаас хойш тав хонож байна. Уг мэдээлэлд “М, Х нарын УИХ-ын гишүүд” хэмээн тодруулснаас хойш мөрийтэй тоглож байгаад баригдсан гэх гишүүдийн эрэлд олон хүн хатаж, олон ч таамаг дэвшүүлсэн байх юм.
Нэрийн эхний үсэг давхцаж буй Ж.Мөнхбат, Л.Мөнхбаатар, Г.Мөнхцэцэг, Д.Мурат, Ч.Хүрэлбаатар нар ээлж дараалан мэдэгдэл хийсээр одоо Д.Хаянхярваа, Ц.Мөнх-Оргил нар дээр “тунаад” байгаа юм байна. Хоёр хоногийн өмнө ЗГХЭГ-ын дарга Л.Оюун-Эрдэнэ Засгийн газрын хуралдааны дараа хоёр гишүүний нэрийг олон нийтэд зарлана гэх яриа хэвлэлийнхний дунд тарсан байсан ч тэр хүлээлт талаар болж, хоёр гишүүдийн нэрийг хэлэхийн оронд Засгийн газрын агентлагийн дарга, төрийн өмчит компанийн ажилтны нэрийг хэлсэн билээ.
Тиймээс хардлагын сүүлийг мушгиж буй хоёр гишүүнээс нөхцөл байдлыг тодруулахад, Ц.Мөнх-Оргил "Ажил тарсны дараа найзынхаа ажлын өрөөнд цай уунгаа ойр зуурын юм ярилцаад сууж байтал гаднаас АТГ-ынхан орж ирээд манай найзыг мэдүүлэг өгөөч гэсэн. Тэр мэдүүлэг өгөхөөр явсан, би ч гэртээ харьсан. Бид хоёроос өөр хүн байгаагүй, тоглоом тоглосон юм болоогүй", Д.Хаянхярваа "Би хэрэв мөрийтэй тоглосон байгаад АТГ-ынханд баригдсан бол нуугаад байх юм байхгүй. Тэртээ тэргүй хуулийн байгууллагынхан ил зарлахын хооронд нууж, үлгэр зохиогоод яахав дээ. Үүнийг мэдээлсэн хэвлэл мэдээллийн байгууллагад намайг мөрийтэй тоглосон гэх баримт нотолгоо байхгүй. АТГ, цагдаагийн байгууллага ч өөрсдөө тийм зүйл болоогүй гээд мэдэгдэл хийчихсэн. Би өнгөрсөн долоо хоногт Монголд байгаагүй. Өчигдөр орой Монголд ирсэн" гэсэн байна.
"
Сэтгэгдэл (2)