Угаарын хийнд хордсон байж болзошгүй 16 иргэн эмнэлгийн тусламж үйлчилгээ авсан боловч дөрөв нь нас барсан харамсалтай хэрэг өнгөрсөн амралтын өдрүүдэд гарлаа. 

Иргэдийн хордсон шалтгаан сайжруулсан түлшний хэрэглээнээс болсон байж болзошгүй гэж үзэж байгаа тул Нийслэлийн онцгой комисс яаралтай хуралдаж, нийслэлийн Засаг дарга С.Амарсайхан хэргийн нөхцөл байдлыг яаралтай шалгаж тогтоох, тухайн иргэдийн хэрэглэж байсан сайжруулсан түлшний дээжээс авч мэргэжлийн лабораториор инжлүүлэх, өмнө үйлдвэрлэсэн болон одоо үйлдвэрлэж байгаа түлштэй харьцуулан нарийвчилсан дүн шинжилгээ хийх үүрэг даалгавар өгсөн юм. 

Өнөөдөр шинжилгээний нэгдсэн хариу гарсныг Нийслэлийн Засаг даргын орлогч Ж.Батбаясгалан, Нийслэлийн мэргэжлийн хяналтын газрын дэд дарга С.Даваасүрэн нар танилцууллаа.

Нийслэлийн Засаг даргын орлогч Ж.Батбаясгалан:

-Аравдугаар сарын 5-6-нд шилжих шөнө Нийслэлийн Онцгой комиссын штаб байгуулан ажиллалаа. Сайжруулсан шахмал түлш борлуулах 17 цэгээс 23 дээж авч АМГТГ-ын харьяа лаборатори, Геологийн төв лаборатори болон барьцалдуулагч бодисыг шалгуулахаар ГЕГ-ын лабораторид шинжлүүллээ. Онцгой комиссын штабд 98 хүн ажиллалаа.

Нийслэлийн мэргэжлийн хяналтын газрын дэд дарга С.Даваасүрэн:

Геологийн төв лабораторид есөн дээж шинжлүүлсэн. Стандартуудыг мөрдөж буй эсэхийг шалгахад нэр бүхий 19 айлаас авсан шахмал түлшний дээж нь чийглэгийг хангасан. Үнслэг нь 23-24 байгаа. Хүхэр нь 0.95-1.04 байна. АМГТГ-ын лабораторид айл өрхөөс авсан дээж болон үйлдвэрийн нунтгаас дээж авч шинжлүүлэхэд бүгд стандартын шаардлага хангасан гэсэн хариу гарлаа. Гаалийн төв лабораторид цардуулыг шинжлүүлэхэд цардуул болон шаварлаг эрдэс агуулж байна гэсэн хариу ирсэн.

Иргэд сайжруулсан түлшинд химийн бодис агуулагдсан, түүнээс болж хордлоо гэсэн мэдээлэл гарч байна. Тэгвэл сайжруулсан түлшинд хэрэглэсэн цардуул нь химийн бодис биш байна. Иргэд химийн бодисонд хордоогүй, угаартсан байна.

Нэг хашаанд хоёр айл сайжруулсан түлш хэрэглэсэн байхад нэг айл нь зүгээр байхад, нөгөөх айлын хоёр хүүхэд угаартаж, хордлого тайлах эмчилгээ хийлгэсэн. Энэ бол хэрэглээнээс үүсч байна. Нийслэлийн иргэд маш олон төрлийн зуухыг хэрэглэж байгаа. Түүндээ сайжруулсан түлшийг хэрхэн зөв хэрэглэх талаар зөвлөгөө зөвлөмжийг өгч ажиллаж байна. Нийслэлийн нутгийн захиргаа, удирдлагын байгууллагууд аравдугаар сарын 1-нээс өндөржүүлсэн бэлэн байдалд ажиллаж эхэлсэн.

Гэр хороололд нийслэлийн иргэдийн 60 гаруй хувь нь амьдарч байна. Эдгээрт нэгдсэн стандарт гэж байдаггүй. Стандартын дагуу баригдсан байшинд угаарын хий мэдрэгч суурилагдсан байдаг бол харамсалтай нь манайд тийм стандарт байхгүй.