Цусархаг халууралт үүсгэдэг эбола вирусний халдвараар нас барсан хүмүүсийн тоо бараг 1 мянгад хүрсэн тухай ДЭМБ ба БНАКонго улсын Нийгмийн эрүүл мэндийн үндэсний хүрээлэнгээс өчигдөр мэдээлжээ. Нас барсан 999 тохиолдол бүртгэгдсэнээс гадна 2473 хүн вирусний халдвар авсан нь оношлогджээ. Мөн 737 өвчтөнийг тусгаарлан эмчилж байна. 

ДЭМБ-ын мэдээллээр, халдвар авсан нь батлагдсан өвчтөнүүдтэй хавьталд орсон бүх хүмүүсийн 82 хувийг хяналтад авсан байна. Халдварын тархалтыг зогсоохын тулд энэ тоог 90 хувьд хүргэх ёстой. Одоогийн байдлаар 116 сая хүн амтай БНАКонго улсын 26 мужийн 5-д нь халдварын тохиолдлууд илрээд байна. Ялангуяа Уганда, Өмнөд Судан улсуудтай хил залгаа Итури муж халдварын голомт болжээ.

Ядуурал ба зэвсэгт бүлэглэлүүдийн хоорондын мөргөлдөөний улмаас Итурид дэгдсэн халдварын тархалтыг зогсооход асар хүндрэлтэй байна гэж “Хил хязгааргүй эмч нар” байгууллагын ажилтан Триш Ньюпорт ярилаа. Төрөл төрөгсөд нь нас барсан хүмүүсийг оршуулахдаа зохих ёсоор хамгаалалтын арга хэмжээ авахгүй байгаагийн улмаас халдвар хурдан тархаж байна. “Үхлийн нэг тохиолдол нь 17 хүнд халдвар тархаах магадлалтай болсныг” Ньюпорт дурджээ.

Эбола вирусний халдварын анхны тохиолдол 5 дугаар сарын 15-нд Итури мужид бүртгэгдсэн бөгөөд энэ үеэр зэвсэгт бүлэглэлүүд уурхайнуудыг хянахын тулд өөр хоорондоо тулалдаж байжээ. Үүний улмаас вирус тархалтыг бүртгэх, хянах боломжгүй байв.  

Халдвар авсан хүмүүсийн биологийн шингэнтэй хүрэлцэх үед вирус халдварладаг бөгөөд далд үе нь 3 долоо хоног хүртэлх хугацаагаар үргэлжлэх магадлалтай. Энэ удаагийн дэгдэлт 2007 онд илрүүлсэн Bundibugyo гэдэг ховор төрлийн вирусний омгоор үүсгэгдсэн бөгөөд үүний эсрэг вакцин, тусгай эмчилгээ байдаггүй. Иймээс нас барах эрсдэл маш өндөр буюу 30-50 хувьтай байгаа юм.

Энэ удаагийн дэгдэлт бол 1976 онд эбола вирус анх илэрснээс хойших 17 дахь удаагийн тохиолдол юм. Өмнө нь 2025 оны 12 дугаар сард дэгдэх үед 64 хүн өвчилснөөс 45 нь нас баржээ.