Үндэсний их баяр наадмын амралтын өдрүүдэд Отгонтэнгэрийн Улсын тусгай хамгаалалттай газрын хамгаалалтын захиргааны мэргэжилтэн, байгаль хамгаалагчид өндөржүүлсэн бэлэн байдлын зэрэгт ажиллаж, хариуцсан хамгаалалтын бүсүүдэд тогтмол эргүүл, хяналт шалгалт зохион байгуулав.
2026 оны 7 дугаар сарын 1-20-ны өдрийн байдлаар тус хамгаалалтын бүсэд нийт 20.549 аялагч, жуулчин зорин ирсэн бөгөөд Отгонтэнгэр хайрхан, Улаагчны Хар нуурын чиглэл хамгийн их ачаалалтай байжээ. Байгаль хамгаалагчдын мэдээлснээр, аялагч, жуулчдын дийлэнх нь хог хаягдлаа ил задгай хаялгүй, зориулалтын цэгт төвлөрүүлж байгаа нь байгаль орчноо хамгаалах иргэдийн ухамсар, хариуцлага сайжирч буйг харуулж байна.
Мөн энэ хугацаанд байгаль хамгаалагчид, хамгаалалтын захиргааны мэргэжилтнүүд болон нутгийн иргэд хамтран нийт 44.5 тонн хог хаягдал цуглуулж, төвлөрсөн хогийн цэгт тээвэрлэн хүргэсэн талаар Отгонтэнгэрийн Улсын тусгай хамгаалалттай газрын хамгаалалтын захиргаанаас мэдээллээ.
