ОХУ-ын Ерөнхийлөгч Владимир Путин, БНХАУ-ын дарга Ши Жиньпин нар Кремльд албан ёсны хэлэлцээ хийж, хоёр улсын харилцааг “шинэ эрин үед иж бүрэн түншлэл, стратегийн хамтын ажиллагааг гүнзгийрүүлэх” тухай хамтарсан мэдэгдэлд гарын үсэг зурлаа. Мөн хоёр улсын засгийн газар болон холбогдох яамд хооронд хамтын ажиллагааг өргөжүүлэх багц баримт бичигт гарын үсэг зурсан байна.

Энэхүү уулзалтын үеэр улс төр, аюулгүй байдал, эдийн засаг, соёл хүмүүнлэгийн салбарын хамтын ажиллагааны талаар дэлгэрэнгүй ярилцсан бөгөөд хоёр улс аж үйлдвэр, тээвэр, логистик, хөдөө аж ахуй, уул уурхайн салбарт нийт 200 тэрбум ам.долларын өртөг бүхий 90 гаруй хамтарсан төсөл хэрэгжүүлж байгаа, цаашид хэрэгжүүлэхээр төлөвлөж буйг В.Путин онцолжээ. Мөн төлбөр тооцоог үндэсний валютаар хийх алхмуудыг эхлүүлээд байгаа юм.

ОХУ, БНХАУ-ын стратегийн томоохон төслүүдийн талаар дараах мэдээлэл гарлаа:

• Алс Дорнодын хийн хоолойг 2027 онд ашиглалтад оруулж, хийн экспортыг жилд нэмэлтээр 10 тэрбум шоо метрээр нэмэгдүүлэхээр төлөвлөжээ.

• Сибирийг дамнасан төмөр зам болон Байгал-Амар мөрний төмөр замыг шинэчлэх ажлууд үргэлжилж байна.

• Хойд тэнгисийн замын хөгжлийг эрчимжүүлж, арилжааны зориулалтаар ашиглах ажлыг эрчимжүүлж буйг Кремль мэдэгдэв.

Олон улсын харилцааны хүрээнд хоёр улсын удирдагчид НҮБ болон Аюулгүйн Зөвлөл дэлхийн асуудалд голлох үүрэг гүйцэтгэх ёстой гэдэг дээр санал нэг байгаагаа илэрхийлсэн байна. Түүнчлэн Евразийн эдийн засгийн холбоо болон Хятадын “Нэг бүс – нэг зам” санаачилгын хүрээнд Евразийн их түншлэл байгуулах зорилттой байгааг Оросын тал мэдэгдсэн юм.

Ши Жиньпин мэдэгдэхдээ, хоёр улсын стратегийн хамтын ажиллагааг улам бэхжүүлэх, улс төрийн итгэлцлийг нэмэгдүүлэх нь чухал хэмээн онцолж, олон улсын харилцаанд НҮБ төвтэй олон талт системийг тууштай дэмжин ажиллах байр суурьтай байгаагаа илэрхийлсэн байна. Мөн Хятад улс нэг талт шахалт, хавчлагын эсрэг хоёр талын ашиг сонирхлыг хамгаалахын тулд Оростой илүү нягт хамтран ажиллах сонирхолтой гэдгээ илэрхийлжээ.

В.Путин есдүгээр сард Бээжин хотноо болох Дэлхийн II дайны ялалтын 80 жилийн ойд зориулсан арга хэмжээнд оролцохоор айлчлахаар төлөвлөж байгаа юм.

Эх сурвалж: RT, Xinhua