Барилга угсралт, их засварын ажлын гүйцэтгэл 2025 оны эхний улиралд 1.4 их наяд төгрөг болж өссөн байна. Үүнээс 1.3 их наяд төгрөгийн ажил дотоодын барилгын байгууллагууд, 79.2 тэрбум төгрөгийн ажил гадаадын барилгын байгууллагуудын гүйцэтгэлд харьяалагджээ.

Дотоодын барилгын байгууллагын гүйцэтгэл өнгөрсөн оны мөн үетэй харьцуулахад 2.8 тэрбум төгрөгөөр нэмэгдсэн бол гадаадтай хамтарсан байгууллагын гүйцэтгэл 1.5 тэрбум төгрөгөөр буурч, 3.1 тэрбум төгрөгт хүрсэн байна.

Энэ хугацаанд барилга угсралт, их засварын ажлын бүтцэд:

• Орон сууцны барилга – 48.0%

• Орон сууцны бус барилга – 40.4%

• Инженерийн барилга, байгууламж – 9.4%

• Их засварын ажил – 2.2% тус тус эзэлжээ.

2024 оны мөн үеэс орон сууцны барилгын ажил 5.6 нэгж хувиар, их засварын ажил 1.1 нэгж хувиар өссөн бол инженерийн барилга байгууламжийн ажил 6.5 нэгж хувиар, орон сууцны бус барилгын ажил 0.1 нэгж хувиар буурсан үзүүлэлттэй байна.

Орон сууцны бус барилгын ажил 547.1 тэрбум төгрөгт хүрч, өмнөх оноос 19.7 тэрбум төгрөгөөр нэмэгдсэн нь дараах бүтээн байгуулалтаас шалтгаалжээ:

• Сургууль, соёлын барилгын ажил – 31.8 тэрбум төгрөгөөр нэмэгдсэн

• Эмнэлгийн барилгын ажил – 12.3 тэрбум төгрөгөөр нэмэгдсэн

• Орон сууцны бус бусад барилга – 11.6 тэрбум төгрөгөөр нэмэгдсэн

• Худалдаа, үйлчилгээний барилга – 10.0 тэрбум төгрөгөөр нэмэгдсэн
  Харин үйлдвэрийн барилгын ажил 46.0 тэрбум төгрөгөөр буурсан байна.

Улаанбаатар хотод дотоодын барилгын байгууллагуудын гүйцэтгэсэн барилгын ажил 795.7 тэрбум төгрөгт хүрч, улсын нийт дүнгийн 62.4 хувийг эзэлжээ.

Орон нутгийн хувьд:

• Өмнөговь аймаг – 196.6 тэрбум төгрөг (Оюу толгойн далд уурхайн бүтээн байгуулалт, авто замын ажил)

• Орхон аймаг – 65.2 тэрбум төгрөг (Эрдэнэт үйлдвэрийн өргөтгөл, орон сууцны барилга)

• Дархан-Уул аймаг – 47.0 тэрбум төгрөг (Орон сууцны барилгын ажил)
  Орон нутгийн нийт барилга угсралтын ажлын 64.4 хувийг эдгээр аймгууд бүрдүүлжээ.

Эх сурвалж: Үндэсний статистикийн хороо