УИХ-ын гишүүн, Байгаль орчин, хүнс, хөдөө аж ахуйн байнгын хорооны дарга Б.Бейсен гурилын импортын тарифын хөнгөлөлтийн талаар мэдээлэл хийлээ.

Б.Бэйсан:

-Өнөөдөр чуулганы хуралдаанаар гурилын импортын татварыг тэглэсэн байсныг цуцлах тухай хэлэлцэж байна. Өнгөрсөн жил зудын байдалтай холбоотойгоор баруун аймгуудад гурил болон тэжээлийн үнэ нэлээд өссөн. Үүнтэй холбоотойгоор импортыг татварыг нь тэглэсэн. Өнөөдөр улсын хэмжээнд Атрын IV аяныг хэрэгжүүлж байгаатай холбоотойгоор энэ асуудлыг дахин авч хэлэлцэж байна. Байнгын хорооны даргын хувьд дэмжиж байгаа ч санал нийлэхгүй хэд хэдэн асуудал байна. Учир нь баруун аймагт гурил өнгөрсөн жил шуудайн 125-130 мянга хүрч байсан бол энэ жил 65-67 мянган төгрөгийн үнэтэй байгаа.

Мөн малын тэжээл буюу хорголжин хэвэг гэхэд 85 мянган төгрөгт хүрсэн бол энэ жил 27-30 мянган төгрөгөөр зарж байна. Гэхдээ газар тариалангийн аянг хэрэгжүүлэхдээ 1.2 сая га талбайд тариалалт хийх ёстойгоос 900 мянган га талбайд тариалалт хийж байгаа. Энийг бүрэн ашиглах хүрээнд 500-600 мянган  га талбайд нэмж тариалалт хийх боломж бий.

Дархан-Уул аймгийн тариаланчид, ард иргэдтэй хэд хэдэн удаа уулзаад ирлээ. Цар тахлын үед тариалан эрхлэгчдэд хөнгөлөлт үзүүлж, татвар болон эрчим хүчний татвар хураамжаас чөлөөлсөн хэдий ч гурилын үнэ нэмэгдсэн. Өнгөрсөн жил 101 тэрбум төгрөгийн хөнгөлөлттэй зээлийг зургаахан гурилын үйлдвэр авсан байдаг. Тийм учраас энэ асуудлыг анхааралдаа авч үзэх ёстой. Бүсчилж тариалалт хийх асуудалд анхаармаар байна. Увс аймгийн гурилын үйлдвэрийг дэмжих хэрэгтэй.

Одоо гурилын үнэ нэмэгдвэл баруун бүсэд гурилын үнэ дахин нэмэгдэх магадлалтай байна. Тиймээс гурилын үнийг бүрэн хаах бус квот тогтоох эсвэл үнийг нь барих хэрэгтэй. Нэг тонн үрийн буудай 1600-1800 төгрөгийн хооронд байгаа бол бодит байдал дээр гурилын үнэ нэмэгдэх магадлалтай. Засгийн газрын бодлогоо дэмжинэ гэхдээ ялгавартай хандахгүйгээр зээлийг жигд олгох нь зүйтэй. Цаашдаа энэ чиглэлийн үйлдвэрийг тогтвортой ажиллуулах, үнэ нэмэхгүй байх тал дээр анхаараасай. Гэхдээ баруун бүсийг онцгой анхаарахгүй бол дахин үнэтэй гурил очвол иргэдийн амьдрал хүндрэх эрсдэлтэй.