Шатрын спортыг дэмжих, түгээн дэлгэрүүлэх зорилготой “Нүүдэл-999” шатрын анхдугаар тэмцээн өнөөдөр Улаанбаатар хотын төв талбайд амжилттай эхэлж, 1000 гаруй шатарчин оролцож байгаа талаар зохион байгуулагчид мэдээллээ. Тус тэмцээнийг Нийслэлийн Засаг даргын Тамгын газар болон Монголын шатрын холбоо хамтран зохион байгуулж байгаа бөгөөд шатар сонирхогчдын дунд оюуны спортыг таниулах, нас насны ангилалд ур чадварыг нь сорих ач холбогдолтой үйл явдал болж байна.

Тэмцээн нийт найман ангиллаар зохион байгуулагдаж байна:

• 7–8, 9–10, 11–12, 13–14, 15–16 насны ангилал

• Насанд хүрэгчдийн “А” зэрэглэл (2100+ чансаа)

• “В” зэрэглэл (1700–2099 чансаа)

• “С” зэрэглэл (0–1699 чансаа)

Шагналын сан 40 сая төгрөг бөгөөд “А” зэрэглэлд түрүүлсэн шатарчин 2 сая төгрөг, мөнгө, хүрэл медальтнууд 1.0–1.5 сая төгрөг, дөрөв, тавдугаар байр 500 мянган төгрөгийн шагнал хүртэх бол “В”, “С” зэрэглэлд түрүүлсэн тоглогчид 1.5 сая төгрөг, хүүхдийн насны ангилалд түрүүлсэн тоглогчид 300 мянган төгрөгийн шагнал хүртэнэ.

Нээлтийн үеэр Нийслэлийн Засаг дарга Х.Нямбаатар “Монголчууд оюуны спортоор дэлхийд үнэлэгдэж байгаа энэ цаг үед 999 хүнийг нэгэн дор хамруулсан шатрын тэмцээн нь оюуны хөгжлийг дэмжих, залуусыг логик сэтгэлгээнд уриалах томоохон боломж” хэмээн онцолсон юм. Тэрээр мөн Улаанбаатар хотод унадаг дугуйн парад, олон улсын “Улаанбаатар марафон”, иргэдийн баярыг уламжлал болгон зохион байгуулах талаар мэдээлэл өгсөн.

Монголын шатрын холбооны ерөнхийлөгч, ЕТГ-ын дарга Г.Занданшатар тэмцээнийг нээж хэлсэн үгэндээ “Шатар бол Монголын соёл иргэншил, нүүдэлчдийн ухаантай салшгүй холбоотой. Хиймэл оюун ухаан хөгжиж буй энэ цаг үед шатрын үнэ цэнэ улам бүр нэмэгдэж байна” хэмээн уриалж, олон нийтийг өргөн хүрээтэй шатрын соёлыг түгээн дэлгэрүүлэхэд оролцохыг уриаллаа.

“А” зэрэглэлд их мастерууд Т.Мөнхзул, Г.Мөнхгал, Б.Хатанбаатар, ФИДЕ мастер М.Гүнбаяр нарын 20 гаруй шилдэг шатарчин есөн өрөг тоглон аваргаа тодруулах бол, “В” зэрэглэлд олон улсын мастер У.Лхамсүрэн, гавьяат дасгалжуулагч, олон улсын мастер Ц.Жигжидсүрэн, ФИДЕ мастер Ж.Лхагва тэргүүтэй 104 шатарчин 13 өрөг тоглох юм. “С” зэрэглэл болон хүүхдийн насны ангилалд мөн 13 өрөг тоглох төлөвтэй байна.

Тэмцээн нэг өдрийн турш үргэлжилж, ялагчид өнөөдөр тодорно.

Эх сурвалж: НЗДТГ, Монголын шатрын холбоо