Дэлхийн худалдаанд үүссэн тодорхойгүй байдал, АНУ, БНХАУ-ын хооронд хурцадсан худалдааны зөрчлийн улмаас алтны үнэ даваа гарагт 3405.19 ам.доллар хүрч, түүхэн дээд түвшинд дахин хүрлээ. Унц алтны үнэ энэ өдөр 2.3 хувиар өссөн бөгөөд хөрөнгө оруулагчид уламжлалт эрсдэл багатай хөрөнгөд хандах хандлага нэмэгдэж байгаа нь үүнд нөлөөлжээ.

АНУ-ын Ерөнхийлөгч Дональд Трамп дөрөвдүгээр сарын 2-нд 180 гаруй орны бараанд шинэ татвар ногдуулах шийдвэрээ зарласны дараа алтны үнэ эрчимтэй өсч эхэлсэн байна. Энэ шийдвэрт хамгийн түрүүнд Хятад улс хариу арга хэмжээ авч, АНУ-ын бүтээгдэхүүнд ижил хэмжээний татвар ногдуулсан юм. Үүний үр дүнд:

• АНУ, Хятад хоёр улс татварын шат дараалсан нэмэгдэл хийж

• Америкийн тал Хятадад ногдуулах гаалийн татвараа 145 хувь болгож

• Хятадын тал АНУ-д ногдуулах татвараа 125 хувь болгон өсгөжээ

Үүний зэрэгцээ, АНУ-ын Засгийн газар Nvidia компанийн H20 хиймэл оюуны чипийг Хятадад экспортлохыг хориглосон бөгөөд дөрөвдүгээр сарын 15-нд гаргасан Цагаан ордны мэдэгдэлд дурдсанаар, Хятадын бараанд 245 хүртэлх хувийн татвар ногдуулах болсноо мэдэгджээ.

Хятад улс энэ бүхний хариуд АНУ болон түнш орнуудын зүгээс гарч болзошгүй Хятадын эрх ашгийг хохироох хэлэлцээрүүдийг эсэргүүцэж, ийм нөхцөл үүсвэл зохих хариу арга хэмжээ авна хэмээн мэдэгдсэн байна.

Алтны үнийн өсөлтөд нөлөөлсөн өөр нэг хүчин зүйл бол Европын Төв банкны хүү бууруулах шийдвэр юм. Өнгөрсөн долоо хоногт тус банк бодлогын хүүгээ 25 суурь нэгжээр бууруулсан нь мөнгөний зөөлөн бодлогын үр нөлөө болон хөрөнгө оруулагчдын найдвартай хөрөнгөд хандах шалтгааныг нэмэгдүүлсэн байна.

Эх сурвалж: Financial Times, Reuters, CNN, Bloomberg