Сонгинохайрхан дүүргийн III хороонд орчин үеийн стандарт хангасан задгай спортын цогцолбор барих ажил эрчимтэй үргэлжилж байна. Улсын төсвийн хөрөнгөөр хэрэгжиж буй уг төслийг “Аглут” компани гүйцэтгэж байгаа бөгөөд өнөөдрийн байдлаар гүйцэтгэл 85 хувьтай байна. Спорт цогцолбор баригдаж буй газрыг 2021 онд чөлөөлжээ.

Цогцолбор дараах байгууламжуудыг багтаах юм:

• 500 хүний суудалтай хөлбөмбөгийн стандарт талбай

• Зургаан эгнээтэй гүйлтийн зам

• 3х3 сагсан бөмбөгийн хоёр талбай

• Талбайн теннисийн талбай

• Чийрэгжүүлэлтийн талбай

• Хүүхдийн тоглоомын талбай

• Иж бүрэн гэрэлтүүлэг, ногоон байгууламж

Тус спортын талбай ашиглалтад орсноор СХД-ийн хүүхэд, залуус чөлөөтэй бэлтгэл сургуулилт хийх, спортын олон төрлөөр хичээллэх боломж бүрдэхээс гадна нийслэлийн хэмжээнд стандарт гүйлтийн замын тоог нэмэгдүүлэх чухал дэвшил болох юм.

Нийслэлийн Хөрөнгө оруулалтын газрын дарга Б.Мөнхбатын мэдээлснээр энэхүү цогцолбор нь нийслэлд баригдаж буй хоёр дахь том спортын цогцолбор болж байгаа бөгөөд олон улс, бүсийн тэмцээн уралдаан зохион байгуулахад бүрэн тохиромжтой стандарттай аж. Цогцолборын дэд бүтцийн хүрээнд:

• Тамирчдад зориулсан ариун цэврийн байгууламж

• Хувцас солих өрөө

• Хурлын танхим зэрэг тусгай зориулалтын барилгууд баригдаж байгаа нь уг байгууламжийг иж бүрэн шийдэлтэй болгож байна.

Эх сурвалж: Нийслэлийн Хөрөнгө оруулалтын газар