Аж үйлдвэр, эрдэс баялгийн сайдын зөвлөх Л.Чой-Иш БНХАУ-ын Хятадын үндэсний газрын тосны корпораци (CNPC)-ийн Эдийн засаг, технологийн судалгааны хүрээлэнгийн ТУЗ-ийн гишүүн, Нарийн бичгийн дарга Цян Син Кун тэргүүтэй төлөөлөгчдийг хүлээн авч уулзлаа.

Уулзалтын үеэр талууд:

• Газрын тосны салбарын хамтын ажиллагаа

• Газрын тосны бүтээгдэхүүний худалдаа, хайгуул судалгаа

• Монгол Улсын нутаг дэвсгэрээр байгалийн хий дамжуулах хоолойн төсөл

зэрэг өргөн хүрээний асуудлаар санал солилцлоо.

Ноён Цян Син Кун CNPC-ийн судалгааны төвийн үйл ажиллагааг танилцуулж, хамтын ажиллагааг дэмжиж ирсэнд талархал илэрхийлэв. Тэрбээр хоёр талын харилцаа бодит үр дүнд хүрч буйг онцлон тэмдэглэсэн байна.

Л.Чой-Иш зөвлөх Монгол Улсын Ерөнхий сайд Л.Оюун-Эрдэнэ-ийн БНХАУ-д хийсэн айлчлалын үеэр CNPC корпорацийн ТУЗ-ийн дарга Дай Хоулян-тай уулзсан нь хоёр улсын газрын тосны салбарын хамтын ажиллагааг өргөжүүлэхэд чухал алхам болсныг дурдав. Тэрбээр үүсч болох хүндрэл бэрхшээлийг харилцан ашигтай, хамтын хүчээр шийдвэрлэхийн чухлыг онцолж, салбарын яамнаас бодлогоор дэмжин, үр дүнтэй хамтын ажиллагааг бий болгоход бэлэн байгаагаа илэрхийллээ.

Уулзалтад CNPC-ийн харьяа:

• Хилийн чанад дахь хөрөнгө оруулалтын орчны судалгааны төв

• Байгалийн хийн зах зээлийн судалгааны төв

• Хайгуул, ашиглалтын судалгааны хүрээлэн

• Петрочайна Дачин Тамсаг ХХК-ийн төлөөлөгчид оролцсон байна.

Эх сурвалж: Аж үйлдвэр, эрдэс баялгийн яам