ОПЕК буюу Газрын тос экспортлогч орнуудын байгууллагаас энэ долоо хоногт нийтэлсэн сар тутмын тайланд дурдсанаар, АНУ-ын Ерөнхийлөгч асан Дональд Трампын хэрэгжүүлсэн татвар, тарифын бодлогын нөлөөгөөр дэлхийн газрын тосны 2025 оны эрэлтийн өсөлтийн таамаглал буурч байна.

Эрэлт 2025 онд өдөрт 1.3 сая баррелиар нэмэгдэнэ гэсэн өмнөх төсөөллөө байгууллага бууруулж, ЕХ болон ЭЗХАХБ-ын гишүүн орнуудад эрэлт сулрах төлөвтэй байгааг дурджээ. ЭЗХАХБ-д хамааралгүй орнуудын хувьд ч эрэлт өдөрт 1.25 сая баррелиар өсөх ч энэ нь өмнөх төсөөллөөс доогуур үзүүлэлт аж.

Мөн 2026 оны дэлхийн эрэлтийн өсөлтийн таамаглалыг ч мөн бууруулсан байна. Тус байгууллага Трампын тарифын бодлого нь дэлхийн эдийн засгийн ойрын төлөв байдлыг улам бүр тодорхойгүй болгож байгааг онцолжээ.

Үүнтэй уялдан ОПЕК дэлхийн эдийн засгийн өсөлтийн таамаглалаа 2025 онд 3 хувь, 2026 онд 3.1 хувь болгон бууруулсан бөгөөд АНУ-ын өсөлтийн хүлээлтийг ч 2025 онд 2.1 хувь, 2026 онд 2.2 хувь гэж өөрчилсөн байна.

Еврогийн бүсийн өсөлт мөн буурахаар таамаглагдаж байгаа ч төсвийн болон мөнгөний урамшууллын бодлого тарифын сөрөг нөлөөллийг зөөлрүүлнэ хэмээн тэмдэглэсэн. Харин Хятад улс худалдааны маргаанаас илүү өртөж болзошгүй ч дотоодын эдийн засгаа идэвхжүүлэх, экспортын чиглэлээ төрөлжүүлэх зэрэг боломж бий гэж тайланд дурдсан байна.

Эх сурвалж: Xinhua