Унгарын парламент "эрэгтэй" ба "эмэгтэй" гэсэн хоёр хүйсийг албан ёсоор зөвшөөрөх тухай Үндсэн хуулийн нэмэлт өөрчлөлтийг энэ долоо хоногт баталлаа. Үндэсний телевизээр шууд дамжуулсан хуралдаанд оролцсон 199 гишүүнээс 140 нь уг шийдвэрийг дэмжсэн бол 21 нь эсэргүүцэж, санал хураалтаас татгалзсан гишүүн байгаагүй юм.
Шинэ нэмэлт өөрчлөлтөд гэрлэлтийн тухай заалтыг “гэрлэлт гэдэг нь эрэгтэй, эмэгтэй хоёрын сайн дурын холбоо” хэмээн тодорхойлсон бөгөөд гэр бүлийг “үндэстэн оршин тогтнохын үндэс” гэж үзэж, “эцэг нь эрэгтэй, эх нь эмэгтэй байна” гэж тусгасан байна.
Энэхүү өөрчлөлтийг эрх баригч “Фидес-Унгарын Иргэний холбоо” нам, Христийн ардчилсан нам, хэт барууны үзэлт “Йоббик”, “Манай эх орон” намын гишүүд дэмжсэн бөгөөд гуравны хоёрын саналын босгыг давсан тул Үндсэн хуульд албан ёсоор өөрчлөлт оруулжээ.
Сөрөг хүчний “Ардчилсан эвсэл”, Социалист намын гишүүд санал хураалтад оролцохоос татгалзсан бол “Моментум” намын гишүүд хуралдааны үеэр эсэргүүцлийн уриа хашгирч, үлээвэр хөгжмөөр дуу чимээ гарган хуралдааныг тасалдуулахыг оролдсон байна. Хурлын дарга дэг сахихыг шаардаж, санал хураалтыг үргэлжлүүлжээ.
Хуралдаантай давхцан парламентын ордны өмнөх Лайош Кошутын талбайд сөрөг хүчнийг дэмжигчид эсэргүүцлийн жагсаал зохион байгуулсан ч цагдаагийнхан зарим хүнийг саатуулсан байна.
Эх сурвалж: TASS
