Засгийн газрын Хэрэг эрхлэх газрын дарга Н.Учрал өнөөдөр хийсэн мэдэгдэлдээ “Эрдэнэс Тавантолгой” ХК-ийн ногдол ашгийг иргэдийн данс руу 4 дүгээр сарын 9-нөөс шилжүүлж эхэлнэ гэж мэдээллээ.

Түүний хэлснээр, ногдол ашиг тараах шийдвэр энэ сарын 4-нд албажиж, иргэдээс И-Монголиа системээр дамжуулан дараах гурван сонголтын хүрээнд санал авсан байна. Үүнд:

• Ногдол ашгаа бэлнээр авах,

• Хуримтлалын данс руугаа шилжүүлэх,

• Хандивлах хувилбарууд багтжээ.

Иргэдийн дийлэнх нь ямар нэг өөр сонголт хийгээгүй тул дансандаа авах хувилбарыг автоматаар сонгогдсон гэж тооцон шилжүүлэг хийгдэхээр болсон байна.

Энэ сард татварын дараах дүнгээр 93,500 төгрөг олгох бөгөөд “Эрдэнэс Тавантолгой” ХК нь өнгөрсөн оны цэвэр ашгаас 1072 хувьцаатай иргэн бүрд нийт 350 мянган төгрөгийн ногдол ашгийг гурван хэсэгт хуваан олгохоор шийдвэрлэсэн билээ.

Цаашид Баялгийн сангийн тухай хуульд нэмэлт өөрчлөлт оруулж, хувьцаа эзэмшигчдэд олон сонголт бүхий хувилбаруудыг санал болгох чиглэлд Засгийн газар ажиллана гэж Н.Учрал онцоллоо.

Эх сурвалж: ЗГХЭГ