Засгийн газрын өнөөдрийн хуралдаанаар Баянгол дүүргийн 29 дүгээр хороонд байрладаг “Эрин эверест интернешнл” сургуулийг төрийн өмчид шилжүүлэн авах шийдвэрийг гаргалаа. Энэ нь тухайн бүсийн боловсролын хүртээмжийг сайжруулах чухал алхам гэж Боловсрол, шинжлэх ухааны сайд Д.Наранбаяр онцолсон байна.
Тэрбээр “Тус сургууль нь олон улсын сургалтын стандарт хангасан, одоогийн байдлаар 1000 гаруй хүүхэд суралцаж байгаа. Ингэснээр ‘Эрин’, ‘Өнөр’ зэрэг хорооллын хүүхдүүд гэртэйгээ ойр байрлах төрийн өмчит сургуульд суралцах боломжтой болж байна” хэмээн мэдээллээ.
Энэхүү шийдвэр нь нийслэлийн хүн амын нягтаршил өндөртэй, сургуулийн ачаалал ихтэй бүсэд боловсролын үйлчилгээний тэгш, хүртээмжтэй байдлыг нэмэгдүүлэх, улсын сургуулийн сүлжээг өргөтгөх зорилготой гэж холбогдох албаныхан тайлбарлалаа.
Эх сурвалж: Засгийн газрын Хэвлэл мэдээллийн алба.
