Энэ сарын 12-нд болсон Засгийн газрын хуралдаанаар дулаан, усны үнийн нэмэгдлийг хойшлуулах шийдвэр гаргаж, холбогдох байгууллагуудад үүрэг чиглэл өгсөн байна.

ЗГХЭГ-ын дарга Н.Учрал энэ талаар мэдээлэхдээ, “Засгийн газар эдийн засгийн нөхцөл байдалтай холбоотойгоор төлбөр, хураамж нэмэгдүүлэхийг хориглолоо. Мөн УИХ-д өргөн барьж буй хууль, тогтоомжуудыг дагалдуулан татвар нэмэхийг зогсоох шийдвэр гаргасан” гэж мэдэгдэв.

Монгол Улсын инфляцын түвшин энэ оны нэгдүгээр сард нийслэлд 9.7 хувь, улсын хэмжээнд 9.6 хувьтай байсан бөгөөд үнийн өсөлтөд эдийн засгийн идэвхжил, цалингийн өсөлт, үйлчилгээ, түрээс, цахилгааны үнэ зэрэг хүчин зүйлс голлох нөлөө үзүүлсэн гэж Монголбанкнаас гаргасан судалгаанд дурджээ.

Тус банкны тооцооллоор инфляц ирэх оны гуравдугаар улиралд 12.4 хувьд хүрэхээр байсан тул Засгийн газар нийтийн хэрэглээний үнийг өсгөхөөс татгалзсан байна.

Эх сурвалж: Монгол Улсын Засгийн газар