Монгол Улсын Ерөнхийлөгч У.Хүрэлсүхийн Бүгд Найрамдах Чех Улсад хийж буй төрийн айлчлалын хүрээнд хоёр улсын хамтын ажиллагааг өргөжүүлэх чухал хэлэлцээрүүд хийгдэж байна. Энэ удаагийн айлчлалаар Монгол Улс, БНЧУ хамтарсан иж бүрэн түншлэлийн тунхаглал гаргаж, хөдөө аж ахуй, хүнсний үйлдвэрлэл, мал эмнэлэг, логистик, аж үйлдвэрийн салбарт Чехийн дэвшилтэт технологийг нутагшуулах сонирхолтой байгаагаа илэрхийллээ.

1996-2017 онд Чехийн Засгийн газар Монгол Улсад 50 гаруй сая ам.долларын хөгжлийн тусламж үзүүлсэн нь хоёр улсын худалдаа, эдийн засгийн хамтын ажиллагааг өргөжүүлэхэд чухал хувь нэмэр оруулсан юм. Одоогийн байдлаар хоёр улсын худалдааны эргэлт нэмэгдэж байгаа ч Монголын экспорт харьцангуй бага хэвээр байна. Европын Холбооны хөнгөлөлтийн ерөнхий системийн хүрээнд Монгол Улс 7200 нэр төрлийн бараа бүтээгдэхүүнийг гаалийн татваргүй гаргах боломжтой тул энэ боломжийг бүрэн ашиглах хэрэгтэйг төрийн тэргүүн онцолсон байна.

Айлчлалын үеэр Прага хотод болсон Чех-Монголын бизнес форум-д хоёр улсын Ерөнхийлөгч нар оролцож, хөрөнгө оруулалтын орчныг сайжруулах, бизнесийн хамтын ажиллагааг өргөжүүлэх талаар ярилцлаа. Энэ удаагийн уулзалтаар Хөдөө аж ахуй, хүнсний үйлдвэрлэл, мал эмнэлгийн салбарт Чехийн технологи, инновацийг нэвтрүүлэх, карго тээвэр, логистикийн салбарт шинэ шийдлүүдийг эрэлхийлэх, аж үйлдвэр, барилга, эрчим хүч, боловсролын салбарт хамтран ажиллах чиглэлээр бодит санал солилцсон байна. Форумд хоёр улсаас 20 гаруй салбарын 100 гаруй аж ахуйн нэгжийн 200 гаруй төлөөлөл оролцжээ.

Мөн энэ үеэр Чехийн Үндэсний музейд “Чингис хаан” олон улсын үзэсгэлэн нээлтээ хийж, Морин хуурын найрал хөгжим Прагийн шилтгээнд тоглолт хийлээ.

Чех Улсад 14,000 гаруй монгол иргэн ажиллаж, амьдарч байгаа бөгөөд тус улс Монголтой нийгмийн хамгааллын гэрээ байгуулсан цөөн орны нэг юм. Үүний үр дүнд Чехэд ажиллаж буй иргэд тэнд төлсөн нийгмийн даатгалын шимтгэлээ эх орондоо тооцуулж, тэтгэвэр тогтоолгох боломжтой болсон нь ажиллах хүчний хувьд чухал ач холбогдолтой.

Айлчлалын хүрээнд Монголын тал Чехийн аж үйлдвэр, хөдөө аж ахуйн дэвшилтэт технологийг эх орондоо нэвтрүүлэх, Чехэд ажиллаж буй монгол залуусын хуримтлуулсан туршлагыг эх оронд нь ашиглах, тэднийг ажлын байраар хангах талаар хэлэлцэж байна. Энэ хүрээнд жижиг, дунд үйлдвэрийг дэмжих хамтарсан сан байгуулах боломжийг судалж буйг албаны хүмүүс онцолжээ.

Эх сурвалж: Монгол Улсын Ерөнхийлөгчийн Тамгын газар, ХХААХҮЯ, ГХЯ.