АНУ-ын Ерөнхийлөгч Дональд Трампын засаг захиргаа Канадаас импортолж буй ган, хөнгөн цагаанд ногдуулсан 25 хувийн нэмэлт татварыг цуцаллаа гэж зарлалаа.
АНУ-ын Худалдаа, үйлдвэрлэлийн асуудал хариуцсан зөвлөх Питер Наварро CNBC телевизэд ярилцлага өгөхдөө, Канадын Онтарио муж эрчим хүчний экспортод татвар ногдуулах шийдвэрээ цуцалсны дараа АНУ татварын бодлогоо өөрчилсөн гэж мэдэгдэв.
Канадын татварын бодлого АНУ-ын хариу үйлдэлтэй уялджээ
Өмнө нь АНУ Канадын ган, хөнгөн цагаанд 25 хувийн нэмэлт татвар ногдуулахаар шийдэж, энэ шийдвэр нь 50 хувьд хүрч нэмэгдэх төлөвтэй байсан. Гэвч Канадын тал АНУ руу нийлүүлэх цахилгаан эрчим хүчинд 25 хувийн татвар ногдуулах бодлогоо цуцалсны дараа АНУ хариу арга хэмжээ авч, ган, хөнгөн цагааны татвараа буцаан цуцалсан байна.
АНУ-Канадын худалдааны хамаарал
- Канад бол АНУ-ын хамгийн том ган нийлүүлэгч бөгөөд 2024 онд 6.5 сая тонн ган экспортолсон гэж Америкийн Төмөр, гангийн хүрээлэн мэдээлэв.
- Бразил улс 4.5 сая тонн ган нийлүүлж, хоёрдугаарт жагссан байна.
- Канад 2024 онд АНУ-д 3 сая гаруй тонн хөнгөн цагаан экспортолж, нэгдүгээрт бичигджээ. Харин АНЭУ 350 мянган тонноор удаалсан байна.
Цаашдын нөхцөл байдал
АНУ-ын талаас Канадын сүү, сүүн бүтээгдэхүүнд ногдуулсан татвар болон бусад импортын хязгаарлалтаа цуцлах шаардлага тавьсан бөгөөд хэрэв дөрөвдүгээр сарын 2-ны дотор Канадын тал хариу арга хэмжээ авахгүй бол:
- Канадаас импортлох авто машины татварыг үлэмж хэмжээгээр нэмэгдүүлнэ гэж Трамп мэдэгдсэн.
- АНУ-Мексик-Канадын худалдааны хэлэлцээрт тусгагдсан бараануудад татвар ногдуулах асуудлыг мөн дөрөвдүгээр сарын 2 хүртэл хойшлуулаад байна.
Д.Трамп бүх улс оронд “харилцан татвар” ногдуулах бодлогоо удаа дараа илэрхийлж байгаа бөгөөд цаашид АНУ-Канадын худалдааны харилцаанд өөрчлөлт гарах магадлал өндөр байна.
Эх сурвалж: CNBC
