Монголбанкны Мөнгөний бодлогын хороо ээлжит хурлаараа бодлогын хүүг 2 нэгж хувиар нэмэгдүүлж, 12 хувь болгон өсгөх шийдвэр гаргажээ. Энэ нь сүүлийн саруудад инфляц 9.6 хувьд хүрч, Төв банкны зорилтот түвшнээс давсан тул хүүгийн өсөлтөөр эдийн засгийн тогтвортой байдлыг хадгалах зорилготой байна.

Үнийн өсөлтөд дараах хүчин зүйлс нөлөөлжээ:

• Цахилгааны үнийн өсөлт, түүний дам нөлөө
• Эдийн засгийн идэвхжил, цалингийн өсөлт
• Үйлчилгээ, түрээс, импортын барааны үнийн өсөлт

Эдийн засгийн төлөв
2024 онд эдийн засгийн өсөлт 4.9 хувьтай гарахад худалдаа, үйлчилгээний салбар, түүнийг дагасан бүтээгдэхүүний цэвэр татварын өсөлт голлон нөлөөлсөн байна. Түүнчлэн:

• Хөдөө аж ахуйн салбарын сэргэлт
• Зэсийн баяжмалын олборлолтын өсөлт
• Шинэ төслүүдийн бүтээн байгуулалт нь эдийн засгийн өсөлтийг дэмжих хүлээлттэй байна.

Гадаад орчинд:

• Геополитикийн тодорхойгүй байдал нэмэгдэж байна.
• АНУ-ын худалдаа, татварын бодлого өөрчлөгдөж, гадаад эрэлт саарах хандлагатай байна.
• Суурь хүү харьцангуй алгуур буурах хүлээлттэй.

Шинэчлэгдсэн зээлийн нөхцөл

• Иргэдэд олгох хэрэглээний зээлийн өр, орлогын харьцааны дээд хязгаарыг 50 хувь болгон шинэчлэн тогтоов.
• Тэтгэвэр, тэтгэмжийн орлого барьцаалсан зээлийн хувьд, зээлийн сарын төлбөрөө төлсний дараах үлдэх орлого нь амьжиргааны доод түвшнээс доошгүй байх нөхцөлтэй байхаар зохицуулжээ.

Ийнхүү Монголбанк 2024 оны эхэнд хэрэгжүүлж байсан зөөлөн бодлогоо чангаруулж, инфляцыг тогтворжуулах арга хэмжээ авч байна.

Эх сурвалж: Монголбанк