АНУ-ын Сангийн сайд Скотт Бессент энэ долоо хоногт Украиныг зорино гэж Ерөнхийлөгч Дональд Трамп мэдэгдлээ. Түүний айлчлал нь Орос-Украины дайныг зогсоох, Украины байгалийн баялгийг Америкт нийлүүлэх боломжийг бүрдүүлэх зорилготой аж.

С.Бессент айлчлалынхаа үеэр Украины газрын ховор элемент, эрчим хүчний нөөцийг АНУ-д нийлүүлэх талаар хэлэлцэхээр төлөвлөж байна гэж эх сурвалжууд мэдээлэв. Түүнчлэн Украины төрийн өмчит зарим компанийн талаар хэлэлцэх төлөвтэй байгаа аж.

Оросын эсрэг хамгаалалтаа бэхжүүлэхийн тулд Украины газрын ховор элементүүдийг АНУ-д нийлүүлэх гэрээ байгуулах хүсэлтэй байгаагаа Ерөнхийлөгч Владимир Зеленский, Дональд Трамп нар илэрхийлээд байгаа юм.

АНУ-ын хэд хэдэн өндөр албан тушаалтан энэ долоо хоногт Европт айлчилж, Киев болон холбоотнуудтай Орос-Украины дайны нөхцөл байдлыг хэлэлцэхээр төлөвлөж байна. Эдгээрт Төрийн нарийн бичгийн дарга Марко Рубио, дэд Ерөнхийлөгч Ж.Д.Вэнс, Батлан ​​хамгаалахын сайд Пит Хегсет, Украины асуудал эрхэлсэн АНУ-ын тусгай төлөөлөгч Кит Келлог нар багтаж байна.

Газрын ховор элементүүд нь цахилгаан автомашин, гар утас, пуужингийн систем болон бусад технологийн үйлдвэрлэлд ашиглагддаг бөгөөд орлуулах боломжгүй тул дэлхийн зах зээл дээрх эрэлт нь нэмэгдсээр байна.

Эх сурвалж: Reuters