Мал аж ахуй, газар тариалангийн үйлдвэрлэлийн үр ашиг, бүтээмжийг нэмэгдүүлж, орон нутагт ажлын байр бий болгож, нийгэм, эдийн засгийн хөгжилд хувь нэмэр оруулсан тэргүүний малчид, тариаланчдыг үнэлэн 2025 онд Улсын аварга малчнаар 140, Улсын хошой аварга малчнаар 14, Улсын аварга саальчнаар 7 иргэнийг, Улсын аварга фермерээр 10 иргэн, аж ахуйн нэгжийг, Улсын аварга тариаланч хамт олноор 17 аж ахуйн нэгжийг, Улсын аварга тариаланчаар 23 хүртэлх иргэнийг тус тус шалгарууллаа.

Монгол Улсын хөдөө аж ахуйн салбарт тэргүүлж буй малчид, тариаланчдыг жил бүрийн сар шинийн баярын өмнө тодруулдаг уламжлалтай. Энэ жилийн шалгаруулалтад мал аж ахуй, газар тариалангийн үйлдвэрлэлд шинэ технологи нэвтрүүлж, бүтээмжийг нэмэгдүүлсэн, хөдөөгийн хөгжилд бодит хувь нэмэр оруулж буй иргэд, аж ахуйн нэгжүүд голлох үзүүлэлт болжээ.

Шалгарсан малчид, фермерүүдийн дунд Монгол орны нөхцөлд нэг саалийн үнээ жилдээ 9.0 мянган литр сүү өгдөг олон улсын жишигт нийцсэн сүүний үхрийн аж ахуй эрхлэгчид, хотоос хөдөө гарч, эрчимжсэн аж ахуй эрхлэн хөдөөгийн хөгжлийн загвар бий болгосон залуу фермер гэр бүлүүд, бэлчээрийн даацад тохируулан малын тоог бууруулж, таваарлаг үхэр сүргийг үржүүлж буй малчид, газар тариалангийн үйлдвэрлэлд шинэ дэвшилтэт технологи нэвтрүүлж, техникийн шинэчлэл хийсэн тариаланч хамт олон, шинэ нэр төрлийн таримал тариалж нутагшуулсан тариаланчид багтсан байна.

Эх сурвалж: ЗГХМОНХГ