Хятадын дотоодын нийт бүтээгдэхүүн /ДНБ/ 2024 онд өмнөх оны мөн үетэй харьцуулахад 5 хувиар өссөнөөр Засгийн газрын дэвшүүлсэн зорилтод хүрснийг өнөөдөр танилцуулсан албан ёсны тоо баримт харуулжээ.
Хятадын Үндэсний статистикийн товчооны мэдээлснээр, өнгөрсөн онд Хятадын ДНБ 134 их наяд юань /ойролцоогоор 18.77 их наяд ам.доллар/ болж түүхэн дээд үзүүлэлтэд хүрсэн байна. Ингэснээр 2024 оны дөрөвдүгээр улиралд өмнөх оныхоос 5.4 хувиар өсжээ. Энэ нь өмнөх жил 4.6 хувиар өсөж байсантай харьцуулахад нэмэгдсэн үзүүлэлт юм.
Гадаадын дарамт, дотоодын хүндрэл бэрхшээл нэмэгдэж байгаа хэдий ч Хятад улс 2024 онд дэвшүүлсэн томоохон зорилтоо амжилттай биелүүлсэн гэж Статистикийн товчооны дарга Кан И хэвлэлийн бага хурлын үеэр хэлээд, эдгээр ололт амжилтад хүрэхийн тулд ихээхэн хүчин чармайлт гаргасныг дурджээ.
Өмнөх онтой харьцуулахад Хятадын ДНБ 2024 оны 10-12 дугаар сард 1.6 хувиар өссөн бөгөөд үүнийг гуравдугаар улиралд 0.9 хувиар өсөж байсантай харьцуулахад мөн сайжирсан байна.
Дотоодын хэрэглээний зардлын өсөлт сул, зарим аж ахуйн нэгжүүд хүндрэлтэй тулгарсан, тодорхой салбар дахь эрсдэлүүд санаа зовоосон асуудал хэвээр байгаагийн зэрэгцээ дэлхийн хэмжээнд геополитикийн зөрчилдөөн, дотоодын үйлдвэрлэлээ хамгаалах бодлого газар авсаар байгаа зэргээс шалтгаалан Хятадын эдийн засагт янз бүрийн хүндрэл сорилтууд тулгарсаар байгаа хэдий ч өнгөрсөн улиралд дээрх өсөлтүүд гарчээ.
Хятад улс багц бодлогуудаа цаг тухайд нь танилцуулж байсан нь эдийн засгийн өсөлт ба итгэлийг бэхжүүлэхэд тус дөхөм болсон гэж Кан И цохон тэмдэглээд, цаашдаа эдийн засгийн сэргэлтийг үргэлжлүүлэн дэмжинэ гэж мэдэгдсэн байна.
