2024 оны байдлаар Бүгд Найрамдах Солонгос Улсад (БНСУ) Монгол Улсын 55,834 иргэн оршин сууж байна. Үүнээс 17,075 иргэн нь бүртгэлгүй буюу визийн зөрчилтэй байна.
2024 онд БНСУ-д манай улсын 38 иргэн нас барсан бөгөөд үүнээс үйлдвэрийн болон авто ослоор 8, амиа хорлолтоор 6, бусад нь өвчний улмаас нас баржээ. Мөн 917 иргэн гэмт хэрэг, зөрчилд холбогдсон байна.
Тус улсад Монгол Улсын 23 иргэн хорих ял эдэлж байгаа бол 18 иргэн урьдчилан хорих төвд шүүхийн хянан шийдвэрлэх ажиллагааны шатанд саатуулагдаж байна.
2023 онд БНСУ-д эмчилгээний шугамаар 22,080 иргэн, давхардсан тоогоор 71,281 иргэн эмнэлгийн үйлчилгээ авсан нь нийт гадаадын 605,768 өвчтөний 3.6 хувийг эзэлж байна.
2024 онд Элчин сайдын яамны Консулын хэлтэс 9 төрлийн иргэний бүртгэлийн үйлчилгээг 8,915 иргэнд үзүүлж, итгэмжлэл 10,543, хуулбар орчуулга 11,147, гарын үсэг баталгаажуулалт 512, нийт 22,202 нотариатын үйлдлийг гэрчлэн, Консулын хэлтсийн шуурхай утсанд хандсан 5,200 гаруй иргэнд мэдээлэл, зөвлөгөө өгсөн байна.
Эх сурвалж: Гадаад харилцааны яам
