“Реал” багийн довтлогч Винисиус, “Вильярреал” клубийн тоглогч Самуэл Чуквуэзе нарыг арьсны өнгөөр гутаан доромжилсон хөл бөмбөгийн нэгэн хөгжөөн дэмжигчийг бүтэн жил хорих ялаар шийтгэжээ.

Нэг хөл бөмбөгчнийг доромжилсных нь төлөө түүнд 6 сарын хорих ял, хоёр хүнийг доромжилсон тул 1 жилийн ял оноосон байна. Түүнээс гадна хөл бөмбөгийн тэмцээн үзэх эрхийг нь 3 жилийн хугацаагаар хасжээ.  

Харин шийтгүүлсэн фанатын нэр, аль клубийг дэмждэг зэрэг мэдээллийг нууцалж байна. Хоёр хөлбөмбөгчнийг гутаан доромжилсон үйлдлүүд “Мальорка Сон Муа” цэнгэлдэх хүрээлэнд гарсан тул яллагдсан этгээд “Мальорка” багийн хөгжөөн дэмжигч байж магадгүй гэсэн таамаг бий.

Винисиусыг доромжилсон хэрэг 2023 оны хоёрдугаар сарын 5-ны “Мальорка” ба “Реал” багуудын тоглолтын үеэр, Чуквуэзег доромжилсон хэрэг хоёрдугаар сарын 18-нд “Вермилион” ба “Вильярреал” багуудын тоглолтын үеэр гарсан байна. Тоглолтууд “Мальорка Сон Муа” цэнгэлдэхэд болжээ.

Өмнө нь Винисиус ярихдаа, Испанийн аварга шалгаруулах тэмцээний үеэр арьсны өнгөөр ялгаварлан гадуурхах үйлдэл цөөнгүй удаа гардгийг дурдаад “расизм энэ улсад ердийн үзэгдэл болжээ, Ла Лиг болон хөл бөмбөгийн холбооны удирдлагууд үүнийг хэвийн зүйл гэж үзэж байна” хэмээн шүүмжилж байв.  

Ийм хэрэг урьд нь хэд хэдэн удаа гарч байжээ. Хэдхэн хоногийн өмнө “Реал”-ын хамгаалагч Тчуамени рүү арьсны өнгөөр гадуурхсан үг хэлээр дайрч доромжилжээ. Доромжилсон этгээд насанд хүрээгүй байсан тул түүнийг хорих ялаар шийтгээгүй байна. Харин хөлбөмбөгчнөөс уучлал гуйхыг үүрэгдэж, нийтэд тустай ажил хийх шийтгэл оноож, торгууль төлүүлэхээр шийдвэрлэжээ. Түүнчлэн бүтэн жилийн хугацаанд цэнгэлдэх хүрээлэнд нэвтрэхийг хориглосон байна.