/Kazinform/ Маргааш буюу лхагва гаригт Испанид нар хиртэх гэж байгаатай холбогдуулан тус улсын Майорка арал дээр онц байдал зарлаж, цэргүүдийг тийш нь илгээжээ.

Жуулчид олноороо ирж буй энэ үед дэг журмыг сахиулахаар ажиллаж байгаа цагдаагийн ажилтнуудад дэмжлэг үзүүлэхийн тулд цэргүүд тус арал дээр 10-наас 14-ний өдөр хүртэл байрлах юм. Тэд замын хөдөлгөөнийг хянаж, аврах албадын замыг чөлөөлж, ойн түймэр дэгдэхээс сэргийлж, нар хиртэх үед иргэдийн аюулгүй байдлыг хангах ажээ. Харин Испани даяар Иргэний гвардын 24 мянга орчим цэрэг дэг журам сахиулахад оролцоно.

Майорка арал дээр нарны хиртэлт орон нутгийн цагаар 19:37 цагт эхлэх бөгөөд бүтэн хиртэлт 20:30 цагаас 20:33 цаг хүртэл 3 минут үргэлжилнэ. Харин хагас хиртэлт 20:53 цаг хүртэл үргэлжлэх юм. Өөрөөр хэлбэл, байгалийн ховор үзэгдэл нийтдээ нэг цаг гаруй хугацаанд үргэлжилнэ гэсэн үг. Хиртэлт нар жаргахаас өмнөхөн болох тул ажиглалт хийх, зураг авахад тун тохиромжтой.

Бүтэн хиртэлт Майорка арлаас гадна Валенсиа, Кастилиа, Галициа, Баск зэрэг бүс нутгуудад болно.