Жендэрийн Үндэсний хороо, Байгаль орчин, уур амьсгалын өөрчлөлтийн яам, Азийн Хөгжлийн банктай хамтран “Жендэрийн эрх тэгш байдал ба уур амьсгалын өөрчлөлт” сэдэвт олон улсын хурлыг 2025 оны тавдугаар сарын 22-23-нд Улаанбаатар хотод зохион байгуулах гэж байна. Энэхүү хурал нь “Биологийн олон янз байдлын олон улсын өдөр”-ийг тохиолдуулан болох юм.

Хурлыг угтсан 27 удаагийн зөвлөлдөх уулзалт гуравдугаар сарын 28-наас дөрөвдүгээр сарын 20-ны хооронд нийслэл болон 21 аймагт зохион байгуулагдаж байна. Уулзалтад төрийн болон төрийн бус байгууллага, хувийн хэвшил, олон улсын байгууллага, хэвлэл мэдээлэл, эрдэмтэн судлаачдын төлөөлөл оролцож, олон улсын хурлын гол баримт бичиг болох Уриалгын төсөлд санал өгч байна.

Энэ сарын 14-нд болсон зөвлөлдөх уулзалтаар хурлын зорилго, онцлог, хүрэх үр дүнг танилцуулж, уриалгын төслийг танилцуулахын зэрэгцээ оролцогчдоос санал, зөвлөмж авсан байна.

Тус хурал болон уриалгын баримт бичиг нь 2026 онд Монгол Улсад болох НҮБ-ын Цөлжилттэй тэмцэх конвенцын Талуудын 17 дугаар бага хуралд оруулах Монголын хувь нэмэр, байр суурийг тодорхойлоход чухал үүрэг гүйцэтгэнэ гэж зохион байгуулагчид онцолжээ.

Эх сурвалж: Жендэрийн Үндэсний хороо