Монгол Улсын Ерөнхийлөгч Ухнаагийн Хүрэлсүх Бүгд Найрамдах Чех Улсад хийж буй төрийн айлчлалынхаа хүрээнд Праг хотын амьтны хүрээлэнд зочиллоо. Тус хүрээлэнд Монголын тахь үржүүлэн хамгаалах ажил амжилттай хэрэгжиж байна.

Эрдэмтэд, судлаачдын тайлбарласнаар, 1890-1902 оны хооронд Монгол нутгаас тахийг Европ руу зөөвөрлөж, тухайн үеийн амьтны хүрээлэнгүүдэд тархаан нутагшуулсан байна. Харин 1992 оноос эхлэн Европын амьтны хүрээлэнгүүд дэх тахийн сүргээс Монгол нутагт эргэн нутагшуулах ажил эхэлсэн бөгөөд Говийн их дархан цаазат газрын Тахийн тал болон Хомын талд 30 тахийг 9 удаагийн тээвэрлэлтээр нутагшуулжээ.

Өнөөдрийн байдлаар тахийн тоо толгой 700 гаруйд хүрсэн талаар мэргэжилтнүүд танилцууллаа.

Ерөнхийлөгч Хүрэлсүх Праг хотын амьтны хүрээлэнд шинээр төрсөн тахийн охин унаганд "Дагина" хэмээх нэр өгч, сүрэг улам бүр өсөн үржихийг ерөөсөн байна.

Тус амьтны хүрээлэн энэ оны 3 дугаар сард Монголын говийг харуулсан үзмэрийн хэсгийг нээж, Монгол гэр байршуулан тахийн нутагшуулах төслийн түүхэн үйл явцыг харуулсан гэрэл зургийн үзэсгэлэн тогтмол дэлгэж буй аж.

Эх сурвалж: Монгол Улсын Ерөнхийлөгчийн Тамгын газар