АНУ-ын Ерөнхийлөгч Дональд Трамп энэ тавдугаар сарын 20-нд тангаргаа өргөсөн Украины Ерөнхийлөгч Владимир Зеленскийг Вашингтонд айлчлахыг урьжээ. Албан ёсны айлчлал хэзээ болохыг одоохондоо зарлаагүй байгаа бөгөөд энэ талаар Украины ерөнхийлөгчийн албан ёсны сайтад бичсэн байна. 

Мөн ерөнхийлөгч Зеленский “Украины газар нутгийн бүрэн бүтэн байдлыг ямагт дэмжиж байдагт нь АНУ-д баярлалаа” хэмээжээ. 

Тусгаар тогтнол, газар нутгийн бүрэн бүтэн байдлаа хамгаалахад нь Украиныг дэмжих тухай хуулийн төсөл АНУ-ын конгресст өргөн барьсан нь манай хоёр орны “старатегийн бат бэх түншлэлийн” чухал илэрхийлэл гэж Украины ерөнхийлөгч онцолсон байна.

Хуулийн төсөлд Украинд зэвсэглэл, батлан хамгаалах зориулалттай нисэх төхөөрөг өгөхөөр тусгасан гэдгийг мэдээлэлд тэмдэглэжээ. Энд танк болон хөлөг онгоц эсэргүүцэх, агаараас эсэргүүцэн хамгаалах хэрэгслүүд байгаа юм. 

Энэ хуулийн төсөл нь Оросын зүгээс ирэх кибер дайралтаас хамгаалах хамгаалалтыг бэхжүүлэхэд хамаатай төхөөрөг багтаж байгааг украины ерөнхийлөгчийн засаг захиргаа онцолжээ.

Хамгийн гол нь хуулийн төсөлд Украины газар нутгийг өөрчилснийг болон оросын хууль сахиулагчид украины 24 далайчныг саатуулан хорьж байгааг АНУ эсэргүүцэж байгааг тусгасан юм байна. 

Үүний өмнө энэ айлчлалын тухай бичиж байсан ZN.UA сайтын ерөнхий редактор Юлия Мостова өөрийн зурвастаа энэ айлчлал Тармпыг ОХУ-ын ерөнхийлөгч Владимир Путинтай уулзсаны дараа болж мэднэ гэсэн байна. Зургадугаар сарын 28-29-ний өдөр Японд болох “Их-20”-ийн хүрээнд Оросын ерөнхийлөгчтэй уулзана гэж Америкийн тэргүүн тавдугаар сарын дундуур хэлж байсан ч Кремль албан ёсоор хариу өгөөгүй байгаа юм.

Украины шинэ ерөнхийлөгч бас Францын Ерөнхийлөгч Эмманюэль Макроноос Парист ойрын үед айлчлах урилга хүлээн авсан гэж Зеленскийн засаг захиргаа мэдэгдэж байсан юм.

Х.Өлзийбаяр "Ардчилал таймс" сонин