Туркменистаны эрх баригчид залуу үеийнхнийг гадаадын их сургуулиудад суралцахыг хязгаарлах, нэгэнт эзэмшсэн мэргэжлээрээ эх орондоо ажиллаж амьдрах боломжгүй болгох нэгэн жигтэй шийдвэрийг гаргажээ.
Дөрөвдүгээр сарын 23-нд тус улсын боловсролын яамнаас танилцуулсан жагсаалтад ирэх есдүгээр сарын 1-нээс эхлэн албан ёсоор хүлээн зөвшөөрөгдөх гадаадын их сургуулиудыг танилцуулсан байна. Жагсаалтад Беларус болон Гүржийн нэг, Казахстаны хоёр, Орос, Энэтхэг, Хятадын хэдэн арван сургууль багтсан байна.
Уг журамд дэлхийн “Топ 1000” их сургуулийн дипломыг хүлээн зөвшөөрнө гэсэн боловч Баруун Европ, АНУ, Канадын ганц ч сургууль багсангүй. Жагсаалтын гадна үлдсэн их сургуулиудын оюутнуудын хувь заяа тодорхойгүй болжээ. Хөрш Тажикстан улсад гэхэд 4000 орчим туркмен оюутан сурхацдаг. Гэтэл жагсаалтад Тажикийн нэг ч сургууль багтаагүй байна.
Үүнээс гадна спортын сэтгүүлч, олон улсын сэтгүүлч, банк санхүү, эдийн засагч, олон улсын харилцаа, хууль, менежмэнт, социологи, антропологи, шашин судлалын мэргэжлийн дипломыг есдүгээр сарын 1-нээс эхлэн Туркменистанд албан ёсоор хүлээн зөвшөөрөхгүй гэжээ. Эдгээр мэргэжлийг эзэмшсэн хүмүүсийг дээд боловсролтойд тооцохгүй гэсэн үг.
Сүүлийн жилүүдэд тус улсын засгийн газар гадаадад суралцдаг залуусыг хавчих бодлого хэрэгжүүлэх болсны нэг жишээ нь гадаадад сурч байгаа оюутнуудад ар гэрээс нь мөнгө шилжүүлэхийг хориглож, гэртээ амрахаар ирсэн оюутнуудыг Туркменистанаас буцаж гарахыг хориглох болжээ. 2006 оноос хойш Туркменистан улсыг тасралтгүй захирч байгаа ерөнхийлөгч Гурбангулы Бердымухамедов улс орондоо хатуу хяналт тогтоох олон арга хэмжээ авсны сүүлийнх нь энэ болж байна.
Radio Free Europe, ikon.mn
Сэтгэгдэл (1)