Өмнөд Африкийн бүс нутаг 129 га талбай ой модтой байсан ч 1990 оноос хойш сүйдэж бараг модгүй болсон байна. Үүнээс улбаалан тус бүс нутгийн байгалийн тэнцвэрт байдал алдагдаж, ургамал, зэрлэг амьтдын тоо толгой буурчээ.
Бразил улсаас гаралтай гэрэл зурагчин Себастьян Салгаду болон түүний гэргий Лэлиа Салгади нар сүйдсэн ой модыг сэргээхээр 20 жилийн хугацаанд 2 сая мод тарьж чаджээ.
Тэд хэдий цөөхүүлээ хэдий ч хэрхэн байгаль орчинд өөрчлөлт авчирч болохыг өөрсдийн жишээн дээр харуулахыг зорьсон аж.
Себастьян Салгаду нь дэлхийд үнэлэгддэг чадварлаг гэрэл зурагчин бөгөөд гэрэл зургийн томоохон гэх бүхий л шагналыг хүртэж байсан мөн гэрэл зургийн олон номоо хэвлүүлсэн нэгэн аж.
Тэрээр 1990 онд уг газарт ирээд маш их цочирдсон гэнэ. “Анх ирэхэд ямар ч өвс ургамал үлдээгүй сүйдсэн байсан” хэмээн дурсамжаа хуваалцжээ. Тэгээд зургийг баримтжуулан аваад нутаг буцсан ч уг нөхцөл байдалд сэтгэл нь зовниж, энэ талаар үргэлж бодох болжээ. Үүнийг сонссон түүний эхнэр “Ой модыг дахин сэргээж болдог. Хоёулаа үүнийг хийе” хэмээн зориг шулуудсан гэнэ.
“Анх намайг ирэхэд газар нутгийн ердөө 0.5 хувьд л мод байв. Эхнэр минь гайхалтай санаа гаргаж бид моддыг бага багаар дахин тарьж эхэлсэн. Түүний дараа шавьж, ургамал үзэгдэх болж шувууд ч нисч ирэх болсон. Ой модод дахин бий болсон шиг бид хоёул дахин төрсөн мэт сайхан санагдаж байна” хэмээн Салгаду сэтгэгдлээ хуваалцжээ.
Тэд тус газар өвс ургамал, моддын 2 сая гаруй суулгацыг тарьжээ. Мөн тэрээр “Хүчилтөрөгчийг бий болгодог моддыг их хэмжээгээр тарина гэдэг зэрлэг амьтдад цаашлаад байгалийн тэнцвэрт байдалд тустай. Дэлхийн хаана ч хүн бүр өөрийн байгаа газраа мод тарих бүрэн боломжтой шүү дээ” гэжээ.