Францын нийслэлд орших 850 жилийн настай, дэлхийн түүхэн өвийг хадгалагч Парисын дарь эхийн сүмд /Нотр Дам/ гал гарч, дээврийн хэсэг нь бүрэн шатаж, чулуун байгууламжаас бусад нь галд автсан билээ. Сүмд өнгөрөгч даваа гаригт буюу энэ сарын 15-ны өдөр гал гарсан юм.
Парисын дарь эхийн сүмд гал гарснаас хойш сүмийг сэргээн босгоход цугларсан хандивын хэмжээ нэг тэрбум долларт хүрчээ. Сүмийг сэргээн босгоход 6-8 жил хэрэгтэй гэж сүмийн тэргүүн ламтан хэлсэн байна.
Харин Францын ерөнхийлөгч Эммануэль Макрон "Бид 5 жилийн дотор Дарь эхийн сүмийг илүү үзэсгэлэнтэй, илүү гайхалтайгаар дахин бүтээн байгуулах болно" гэж амлажээ.
Зарим мэргэжилтнүүд түүнийг бүрэн сэргээхэд 15 жил шаардлагатай гэсэн юм. Харин сэргээн засварлах үеэр сүмийн ажиллагаа тасалдахгүй нийтэд нээлттэй байна гэж сүмийн тэргүүн лам хэлсэн байна.
Өнгөрсөн лхагва гаригаас эхлэн прокурорууд, шинжээчид шатсан сүмд ажиллаж байгаа бөгөөд цахилгааны богино холболтоос үүдэлтэй гал гарсан байх боломжийг анхааралтай мөрдөн шалгаж байгаа аж. Тухайн үед сүмийн модон оройг сэргээн засварлах ажиллагаа явагдаж байсан юм.
М.Цогт