Ням гаригт Шри Ланкийн нийслэл Коломбод гарсан цуврал дэлбэрэлтийн улмаас амиа алдагсдын тоо 290, шархдагсдын тоо 500 хүрээд байна. Улаан өндөгний баяраар загалмайн шашинтнуудыг чиглэсэн энэ халдлага загалмайтны сүм болон гурван зочид буудлыг хамарчээ.
Халдлагын үеэр Дани улсын тэргүүн баян Андерс Холч Повлсены хүүхдүүд мөн амь үрэгдсэн байна. Баяр тохиолдуулан гэр бүлээрээ Шри Ланкад аялж байсан тэдний дөрвөн хүүхдийн гурав нь дэлбэрэлтэд өртөж амиа алдсаныг Повлсены эзэмшдэг Bestseller компанийн төлөөлөгч баталсан байна.
46 настай Холч Повлсены хөрөнгийн хэмжээг нь $7.9 тэрбум гэж Форбс сэтгүүл тооцоолсон ба түүний мэдэлд хувцас үйлдвэрлэлийн Bestseller компани, Британий онлайн бэлэн хувцасны дэлгүүр Asos байдаг. Тэр 1975 онд байгуулагдсан Bestseller компанийг эцэг эхээсээ өвлөн авчээ. Энэ группын бүрэлдэхүүнд Vero Moda, Only, Jack & Jones брэндүүд байдаг бөгөөд дэлхийн 70 улсад 3000 гаруй дэлгүүртэй. Үүнээс гадна тэр Германы онлайн худалдааны Zalando компанид хувь эзэмшдэг. Повлсены гэр бүл Шотландад их хэмжээний газар, үл хөдлөх хөрөнгө эзэмшдэг юм байна.
Өчигдөр Шри Ланкийн засгийн газар дэлбэрэлтүүдийг тус улсын NTJ (National Thowfeek Jamaath) исламын экстремист бүлэг үйлдсэн гэж зарлав. Дэлбэрэлтийн улмаас амиа алдагсдын ихэнх нь Шри Ланкийн иргэд, түүн дотроо шашны цөөнх болох загалмайтнууд байна. Тэднээс гадна гадаадын 11 улсын 30 гаруй жуулчин хэлмэгдсэн гэгдэж байна. Одоогоор Британи, Энэтхэг, Испани, Австрали, АНУ, Хятад, Швейцар, Нидерланд, Япон, Португалийн засгийн газрууд өөрийн иргэдээ амь үрэгдсэнийг баталжээ.
Эх сурвалж: AFP