Дэлхийн 30 гаруй оронд амжилттай зохион байгуулагдаж буй бизнесийн реалити шоу “Шарк танк” нэвтрүүлгийн Монгол дахь хоёрдугаар цувралаа үзэгчдэдээ хүргэж дуусчээ.
Энэ удаагийн цувралд нийт 300 гаруй гарааны бизнес эрхлэгч бүртгүүлснээс 23 бизнес эрхлэгчийн төсөл, бизнес хөрөнгө оруулалтаа авах санал авч чадсан байна.
Бизнес эрхлэгчдэд нэвтрүүлгийн үеэр нийт 3.2 тэрбум төгрөгийн хөрөнгө оруулалтыг шаркууд хийсэн байна.
Гарааны бизнес эрхлэгчдэд том боломж олгодог тус нэвтрүүлгийг “Монгол ТВ” телевиз 2017 онд анх албан ёсны эрхтэйгээр үзэгчдийн хүртээл болгож байсан юм. Энэ жил 10 жилийн ойтойгоо золгож байгаа тус телевизийн хамт олон дэлхийн хэмжээний шоу нэвтрүүлгүүдийг өндөр чанартайгаар үзэгчдэдээ хүргэдгийн нэг нь “Шарк Танк” нэвтрүүлэг.
Энэ жил тус нэвтрүүлгийн шаркуудын бүрэлдэхүүнд Гацуурт компанийн ерөнхий захирал Л.Чинбат, Хас банкны ерөнхий захирал Г.Амартүвшин, МАК группийн ерөнхийлөгч Н.Цэлмүүн нараас гадна ЭМ СИ ЭС группийн дэд ерөнхийлөгч Д.Энхтүвшин, Петровис группийн ТУЗ-н дарга Ж.Оюунгэрэл шинээр орж, жижиг дунд бизнес эрхлэгчидтэй уулзан хөрөнгө оруулалт шаардлагатай байгаа бизнесүүдийг дэмжсэн юм.
Оролцогчдын тухайд өмнөх жилүүдээ бодвол энэ жил бизнесийн бодит үнэлгээтэй орж ирсэн нь шаркуудад илүү таалагдаж байлаа. Тэднээс “Бүжинд тохиолдсон хөгжилтэй явдлууд” хүүхдийн номоороо Б.Индра, мөн нэвтрүүлгийн сүүлийн дугаарт оролцож амьдрал бол тэмцэл гэдгийг харуулсан оролцогч Н.Батбилэг нар таван шаркаас хөрөнгө оруулалт босгож чадсан билээ.
Эх сурвалж: "MONGOL HD" телевиз