МАН-ын гишүүн Т.Аюурсайхан, Ж.Оюун-Эрдэнэ, Х.Нямбаатар нартай дөрөө харшуулан мэдэгдэл хийж, ЖДҮ Засгийн газрын хамгаалсан Ж.Батзандан, Л.Болд нар өнөөдөр ээлжит мэдээллээ хийлээ. Тэд улс төрийн шинэ нам байгуулах болсноо зарлав.
У.Хүрэлсүхийн Засгийн газрыг огцруулах АН-ын шийдвэрийг эсэргүүцэж санал өгснийхөө төлөө АН-ын гишүүнээс хасах сануулга аваад байсан Л.Болд, Ж.Батзандан нар ийнхүү намынхаа удирдлагаас өрслөө. Ингээд АН албан ёсоор УИХ-д бүлэггүй болж байна. Одоо зөвхөн уг асуудлыг УИХ эцэслэн шийдвэрлэх л үлдээ.
Харин намаасаа хөөгдсөн хоёр гишүүний хувьд одоогоор ямар нэртэй нам байгуулсан, эсвэл байгуулах эсэх нь тодорхойгүй байна. Тэд удахгүй намынхаа их хурлыг хийж, намын бодлого, үйл ажиллагааны чиглэлээ тодорхойлж, нэрээ өгнө гэв.
Энэ талаар Л.Болд гишүүн:
-“АН-ын бүлэг гурван гишүүнээ хөөсөн. АН гишүүдээ хөөдөг нам байж таарахгүй. Би АН-ын удирдлагуудад сануулга өгч намаасаа гарсан. Гэсэн хэдий ч АН өнгөрсөн хугацаанд хууль бус шийдвэрээсээ татгалзах байх гэсэн. Татгалзаагүй. УИХ-ын гишүүн Ж.Батзанданг АН-ын гишүүнээс гарч байгаа тухай шийдвэрийг УИХ-ын дарга асан М.Энхболд намрын чуулганы үеэр мэдэгдсэн. Ж.Батзандан бид хоёр нам бус гишүүн болсон. Бид сонгогчидтойгоо уулзаж, энэ талаар хэлсэн. Ж.Батзандан бид хоёр АН-аас нэр дэвших эрхгүй болсон. УИХ-д суудалтай шинэ нам байгуулж, шинэ ардчилсан, хөгжлийн төлөө нам байгуулж байгаагаа зарлаж байна. Монголын төлөө гэсэн намыг байгуулна" гэлээ.
Харин УИХ-ын гишүүн Ж.Батзандан:
-“Өнөөдөр Монгол цэргийн өдөр. Олон зэвсэгт хүчин, дайчид эх орноо хамгаалж байгаа. Энэ сайхан өдөр Л.Болд гишүүнтэй хамт шинэ улс төрийн хүчин байгуулж байгаагаа зарлаж байна. Монголд шударга ёсыг тогтоож чадах шинэ хүчин хэрэгтэй байна. МАНАН-гийн улс төр Монгол төрийг гадныханд атгуулж байна. Хүн амын 80 хувь ядуу, хүчирхэг дундаж давхрага байхгүй болсон гэсэн судалгаа байна. Төрийн эрх мэдлийг мафи барьдаг болсон байна. Энэ бүхнийг эцэс төгсгөл болгохын тулд Монголын хөгжлийн төлөө шинэ улс төрийн хүчин байгуулж байна. Ардчилсан намаас хөөгдөх бол бурхны бидэнд өгсөн боломж байлаа" гэв.